أرجوك كفاية اعذار

زمان ما كتبت هون.

بصراحة مهو الكمبيوتر اللي عليه فوتوشوب خربان, كيف يعني بدي اصور وأرفع صور بدون تعديل ولوغو؟

طيب, والكمبيوتر اليوم تصلح؟

لا.

طيب, كيف قررتِ ترجعي تكتبي؟ المقالة بدون صور؟

لا, مع صور.

طيب؟

ولا اشي صورت ورفعت بدون تعديل ولا لوغو. عادي.

الكمبيوتر الخربان كان مجرد حجة. عذر. انا اعطيته لنفسي عشان أبررلها ليش انا ما بكتب.

بحياتي مرقت بكثير مواقف كنت احاول الاقي تبريرات لعدم قبولي عرض او اقتراح معين, او لعدم نجاحي بخطوة معينة.

فش اشطر مني ابدأ الجملة بـ “مهو”.. مهو ومهو ومهو…

كنت افكر اني هيك برتاح انا وضميري. بس اللي اكتشفته اني هيك ببلّد انا وضميري, بنخبل انا وضميري, او اي كلمة ثانية بتلاقوها مناسبة توصف هاي الحالة من الكسل والعلقان بنفس المحل الناتجة عن التبريرات اللي بنعطيها لأنفسنا.

انا طبعًا ما بحكي عن الاسباب الحقيقية اللي عنجد بتمنعنا نعمل اشي معين. في فرق بين شخص عنده عذر صحي حقيقي يمنعه من ممارسة الرياضة وبين لما يكون عذره “مهو معيش وقت”. انت مش ما معك وقت, انت ما عندك ادارة ذات. او على ما يبدو الرياضة مش اشي مهم بالنسبة الك زي ما بتحاول تفهّم نفسك وتفهّم اللي حواليك.

باختصار, انتبهوا لما تقرروا تعملوا خطوة معينة, او ما تعملوها, اذا السبب اللي بتحاولوا تقنعوا فيه انفسكم واللي حواليكم هو سبب حقيقي ولا مجرد حجة وعذر. الاشي له تأثير على نتائجكم بالحياة.

وعشانكم شطورين وناويين تبلشوا تميزوا وما تخلوا الاعذار توقفكم عن التقدم, بدي اهديكم هالوصفة الزاكية.

IMG_7767-01

سابليه مغطى شوكلاتة روبي (مش اختراعي. الطريقة شفتها على شي موقع انترنت, طبقتها وترجمتها)

لا مش شوكلاتة روبي المغنية ام البسكليت. شوكلاتة روبي هي النوع الرابع من الشوكلاتة اللي تم اكتشافه مؤخرًا, بعد الشوكلاتة الداكنة, شوكلاتة الحليب, والشوكلاتة البيضاء (اللي هي مش شوكلاتة اصلًا!). طعمها بيعطي شوي على فواكه, بس انا حبيت طعمها (ولونها!) كثير.

IMG_7748-01

المقادير:

300 غم طحين

75 غم سكر ناعم

75 غم لوز مطحون

180 غم زبدة

بيضة

شوكلاتة روبي (مكتوب باكيت بالوصفة بس انا حسيته مش كفاية, استخدمت شوكلاتة عادية لبقية البسكوتات.

الطريقة: بالخلاط ( بنستعمل مش القطعة اللي بتخفق, ولا اللي بتعجن, الثالثة. بعرفش شو اسمها!)بنحط الطحين, السكر, اللوز, والزبدة الباردة اللي قطعناها لمكعبات, بنخلط لحد ما يتكون معنا خليط زي حبات الرمل. بنضيف البيضة وبنخلط لحد ما تتكون معنا عجينة. انا ضفت كمان فانيلا سائلة.

بنغطي العجينة بنايلون وبنتركها بالثلاجة تبرد شي ساعة. بعدين بنرقها (بدنا طحين عشان ما تلزق) وبنقطع دوائر بقطاعة البسكوت او فنجان قهوة. بنخبزها بفرن على حرارة 170 لمدة ربع ساعة.

لما تبرد بنذوب الشوكلاتة بالميكروويف او على حمام مائي بان ماري, وبنغمس كل قطعة بسكوت بالشوكلاتة. بنزينها بأي اشي متوفر. او بنفع بدون زينة. انا زينتها بورد مجفف قابل للأكل.

وصحة وعافية.

IMG_7762-01

وبلا حجج عاد. قوموا تحركوا, اعملوا تغيير, اعملوا اشياء جديدة, تخافوش من التجربة, وتحاولوش تبرروا لحالكم عدم التجربة بمليون حجة.

وعلى قول المثل اللي بعرفش مين حكاه بس اكيد مش ستي : كلنا مليونيرات, يا بكون معك مليون دولار, يا مليون حجة. بس بنفعش يكون معك الجهتين.

IMG_7720-01

 

 

 

 

 

 

 

 

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s