الوسم: حلويات رمضان

بصراحة السنة كان رمضان من اصعب السنوات عليّ, بتذكرش ولا سنة حسيت بالثقل اللي حاسة فيه اليوم. ضعف جسدي على تعب نفسي على نوع من الاكتئاب.. بالعكس, كنت دايماً استناه, وازعل لما يخلص, كنت احسه شهر خفيف لدرجة اني سميت صفحة الوصفات الرمضانية اللي انشأتها “خفيف في الصيف” لأنه كان بالنسبة الي عنجد خفيف حتى ولو انه بالصيف.. بس السنة حتى هالصفحة كانت ثقيلة علي وما فعلتها تقريباً بالمرة..

ما عندي تفسير ليش هيك صار السنة معي. مع اني حضرت نفسي نفسياً وجسدياً واجتماعياً لهالشهر اكثر من اي سنة مضت.. والاشي جداً مضايقني لأني زي ما ذكرت في بوست سابق تربيت على حب رمضان, والسنة حسيت اني ما قدرت اثبت هالحب على ارض الواقع..

من ناحية عبادات الحمد لله, واظبت على الصيام حتى في اصعب الايام اللي كنت فيها على وشك الانهيار,  الصلوات في اوقاتها وعلى رأسها الفجر, ختمت القرآن وواظبت على الاذكار, بس مع ذلك حاسة بتقصير فظيع تجاه خير الاشهر.. خلص يا عمي في اشي ناقص..

في شعور  هيك براحة من نوع غريب صعب اوصفه كان يرافقني كل سنة, هالسنة نسيني..

شهيتي اشتاقتلي..

حتى مطبخي افتقدني ..

وعشان ارضيه, واحسس حالي اني ما زلت قادرة على ممارسة الفنون الرمضانية المعهودة بالرغم من الوهن الجسدي الملحوظ, كان لازمها لقمة بسبوسة بالقشطة نحلّي فيها الجو, لا؟!

المقادير:

كاسة ونصف سميد

ملعقة كبيرة بيكينغ باودر

3 ارباع كاسة سكر

3 بيضات

ملعقة صغيرة فانيلا

كاسة جوز هند

3 ارباع كاسة زيت

علبة لبن

لخليط القشطة: علبة قشطة, كاسة ونص حليب,  4 ملاعق كبيرة نشا, 4 ملاعق كبيرة سكر.

قطر بارد (كاسة ماء لكل كاسة ونص سكر)

الطريقة:

نخلط جوز الهند والسميد.

في الخلاط نضع اللبن, الفانيلا, البيض, البيكينغ باودر, السكر, الزيت ونخفق. نضيف الخليط على خليط جوز الهند ونحرك حتى يتجانس.

ندهن صينية بشوية طحينة, نصب نصف الخليط فيها ونتركه يرتاح. بعدين بنخبزه بحرارة 180 بس لمدة 10 دقائق.

بهذا الوقت بنحضر خليط القشطة, عالغاز بنحط كاسة حليب, في وعاء ثاني بنحط نص الكاسة الباقية وبنضيف النشا والسكر, بنضيف هالخليط على الحليب الساخن وبنحرك على طول, بنضيف القشطة.

بندير خليط القشطة على نص العجينة المخبوز, وفوقها نص العجينة الباقي, وبنخبز لحد ما يتحمر سطحها (ممكن ندهن سطحها بالطحينة كمان).

بنشرّب البسبوسة بالقطر البارد.

يعني بعرفش بضحك على حالي ولا على مين بصينية هالبسبوسة, بس وعد بعد رمضان في الي مع نفسي جلسة تقييم نشوف شو اللي صار معنا.. لأنه المشكلة فينا اكيد..

الله يسهل عليك يا رمضان, كلها كم يوم وبنودعك, والله اعلم نلتقي السنة الجاي او لا, بس بتأمل الله يبلغنا اياك واحنا بحال افضل, ويقدّرنا على اعطائك قيمتك اللي السنة قصرنا فيها..

تقبل الله منا ومنكم..