المسلسل التركي “فطيرة لميس”

اذا بدي الخص رحلتي لمنطقة الريف في شمال تركيا, بقدر اقول باختصار “الماء والخضرة والوجه الحسن, وجامع لكل ثلاثة بيوت!”

الخضار الطاغي على هديك البلاد ملفت للنظر, كمية المياه الموجودة بكل محل حواليك , عنجد صدق المثل اللي قال المي بتمشي من تحتي وانا مش حاسس! مي ايفري وير !

والوجه الحسن, على ما يبدو صفاء الهواء ونقاء الماء والراحة النفسية هي اساس الجمال.. لأنه جمال الريفيات (والريفيين!) كمان كان ملفت للنظر بالرغم من بساطته. نفسي اعمل احصائية لعدد الجلطات اللي بتصيب الناس هناك.. اتوقع انها قريبة من الصفر!

بس عنجد اكثر شي كان ملفت لنظري هو كمية الجوامع.. عنجد بدون مبالغة بين كل ثلاثة بيوت بتشوف جامع! عنجد كان اشي مؤثر جداً ومن اكثر الاشياء اللي لامست قلبي.. بس بما اني حدا قلبه مربوط بمعدته, كمان اشي لامس قلبي وحواسي هو توفر  الاكل وعدم وجود اي اشي يقيدك, يعني بتقدر توكل كل ثلاث ساعات زي الاطفال! كل شي متوفر, كل شي حلال, كل شي مريح وكل شي رخيص.. وهاي من اكثر اسباب الغزو السياحي لتركيا من قبل العرب برايي… قد ما تقولوا بنحب نجرب بلاد جديدة وسياحة متطورة بس بالنهاية احنا شعب مربوط من معدته ما في شك!

دخلت مطاعم منوعة وجربت اكلات اشي حبيته وانسجمت معه بما انه معظم الاكلات بتشبهنا, واشي لأ.. كثير حبيت اجرب اكلة “الموهلاما” اللي بتنشهر فيها منطقة طرابزون  وهي عبارة عن جبنة صفراء وزبدة طايشة فوقها.. دسم  دسم دسم… صح اكلتها في الهواء الطلق وقبالي الشلالات في المنطقة الساحرة “ايدر” بس اي والله برضو ما حبيتها 😦

img_6939-edit
الموهلاما.. حتى الشلال ما شفعلها!

اكثر اشي حبيته بصراحة تستغربوا, اشي كثير بسيط وعادي وموجود بكل محل هون بس خلص سبحان الله.. الفطيرة اللي اكلتها من ايدين الحجة بطريقنا لبحيرة اوزنجول نسيت اسألها شو اسمها او بالاحرى معرفتش اتواصل معها الا بالاشارة, يلا بنسميها الحجة ام اوغلو (بعرف انه اوغلو بتزبطش هون بس مشّوها هذا اللي طلع معي!).. فطيرة بسيطة عالصاج طلبت تحشيلي اياها شوكلاتة. هي يمكن فطيرة عادية جداً بس بعرفش شو شدني اجربها.. يمكن ابتسامة الحجة اللي وصلتلي رسالة “لسا الدنيا بخير”, يمكن الطيبة اللي شميت ريحتها طالعة من الصاج.. بعرفش..

img_6674-edit
الحجة ام اوغلو

هو اي اشي فيه شوكلاتة بحبه, واي اشي فيه شوكلاتة سخنة بحبه اكثر واكثر.. خاصة لما تصير تسحسح وتعبي الدنيا وما يكون حواليك محارم.. يا سلاااام !

وخلصت الرحلة ورجعنا عالبيت.. وقلت اضرب عصفورين بحجر.. قررت اجرب اعجن عجينة مناسبة لفطاير مقلية (بما انه فش عندي صاج) وبنفس الوقت تناسب فطاير مخبوزة اللي كمان مشهورة بتركيا Turkish pide.

طعم.. تنويع.. توفير !!

img_7213

طريقة العجينة:

3 كاسات طحين

ملعقة كبيرة ممسوحة خميرة

2 ملاعق كبيرة حليب بودرة

ملعقة كبيرة سكر

كاسة – كاسة وربع ماء

ملعقة صغيرة ملح

شوية زيت زيتون

الطريقة:

نعجن كل المواد وبنشكلها على شكل كرة كبيرة بندهنها زيت زيتون وبنغطيها وبنتركها تخمر حوالي ساعة. بعدين بنقسمها قسمين, او مثل ما بدكم, بس انا عملت الوصفتين بنفس العجينة. على كل الاحوال لازم نقطعها كرات. انا عملت 4 كرات كبيرة و 4 صغيرة.

للفطاير بالفرن: حضرت حشوة عبارة عن جبنة بيضاء, جبنة صفراء, وبقدونس مفروم.

رقّيت الكرات الكبيرة على شكل بيضاوي, فردت حشوة الجبنة على طولها وسكرتها من الاطراف زي شكل القارب.

img_7227

دهنتها شوية زيت وخبزتها بفرن بحرارة 180 لحد ما تتحمر.

بالنسبة للفطائر الحلوة المقلية, رقيت الكرات الصغيرة قدر المستطاع, وقليتها بدون زيت بمقلاية تيفال بتلزقش. بالاول بنقلي وجه واحد شوي بس, بعدين بندهن شوكلاتة عالوجه النيء, بنطوي الفطيرة وبنكمل قلي. اه بتستوي على فكرة! هو ممكن تنقلى عالوجهين وبعدين بتنحشى بس حسيت هديك الطريقة ازكى لما تكون الشوكولاتة built-in!

هو بصراحة بيني وبينكم الحكي, انا مش من عشاق تركيا المتيمين اللي بقدسوا كل شي فيها واللي اول ما بفكروا برحلة رأساً بتخطر ببالهم..  ولا من عشاق اللغة التركية, ولا الموسيقى التركية.. بالنسبة الي هي دولة لزيارة لمرة واحدة. بس الصراحة منطقة الشمال والريف, على بساطتها وطيابة ناسها وريحة هواها, هي عالم اخر بالرغم من مشقة الوصول الها نسبياً.. كمان انا مش من عشاق المسلسلات التركية. بتذكر المسلسل الاول والاخير اللي حضرته مدبلج من التركي هو “سنوات الضياع”. يمكن لأنه كان اول مسلسل بنعرض من هالموديل, بس رأساً عرفت انه هالاتجاه مش الي بالمرة.. من بعد يحيى ولميس ما شفت التركي! يلا نسمي هالفطيرة “فطيرة لميس”؟! (البنات بتقدروا تسموها فطيرة يحيى بس انا بديش اجيبلكم الحكي!)

img_7184

بقدرش اقول انه الطعم مثل اللي اكلته بتركيا تماماً بس يعني  على الاقل هيك كل ما اشتاق للحجة ام اوغلو وريحة صاجها بعرف شو اعمل.. فطيرة لميس 🙂

صحة وعافية.

img_7176

يورمضان.. الفكرة والنسخة الالكترونية

“يورمضان” هي فكرة, انولدت من الحيز الافتراضي قبل سنتين بفقرة “مونديال بيتاكل” خلال كأس العالم, لما قررت اطبق اكلات من مطابخ الدول المشاركة بكأس العالم 2014 واشارك الطرق على الفيسبوك, لما سألتكم وقتها شو الاكلة اللي بتميز المطبخ النيجيري وهربتوا متذكرين؟! بديش اقول شو عملتوا لما سألتكم عن مطبخ ساحل العاج!

بالنسبة الي, هاي الاحداث الكروية العالمية هي اكثر بكثير من مجرد كرة, هي ثقافة !

السنة قررت اني لازم اطبق الفكرة بس على ارض الواقع, على ورق.. صح يعني مش حابة اسبب اذى للبيئة, بس كمان انا من عشاق الذكريات والاحتفاظ بالاشياء خارج العالم الافتراضي..

بصراحة بخبيش انه الفكرة طلعت بفترة كنت عايشة فيها نوع من هبوط معين اخذ من وقتي وتفكيري زيادة, لذلك قررت اني لازم اطلع بإشي “غير شكل” بهاي الفترة بالذات!

بطولة امم اوروبا- اليورو, واللي بتصادف هالمرة احداثها بشهر رمضان المبارك, ساعدتني اكثر ببلورة الفكرة. المطابخ الاوروبية مشهورة بحلويات جزء منها بنعرفه وجزء لأ, فكرت ليش ما نحاول نطبقها خلال رمضان, مش كل يوم قطايف وكنافة , التنويع حلو.. خاصة اذا بنلائم الاشي لنكهاتنا الرمضانية, يعني مش شرط التيراميسو الايطالي نعمله مع شراب القهوة المركز زي مهو متّبع, ممكن نستبدله بالقطر بنكهة ماء الزهر! ششش ما حدا يحكي للطليان عن هالعملة المهببة!

وبما اني حابة تكون هالفكرة هدية بمناسبة الشهر الفضيل, ومش معنية ولا بأي ربح مادي من وراها, كان لازم الاقي دعم .. بنكرش اني توجهت لجهة معينة اللي تحمست للفكرة بس ماصار نصيب, وبنكرش اني انا عندي مشكلة مع هاي الامور المادية, بحبش احس حالي بشحد مع انه الاشي زي ما حكيت مش لربح مادي شخصي..

فعاودت تنازلت..

بس الفكرة جواتي ما قبلت تتنازل.. ربنا الهمني اني اعرض الفكرة على زميل, مهنته زي ما هو عرّفها مؤخراً “يحقق احلام الاخرين”.. بالرغم من ان وضعه المادي والمعنوي بالفترة الاخيرة مش بالسما, بس صمم انه يساعدني.. “فكرتك بدها تتنفذ لو مهما كلف الامر”..

مع هاي الجملة انطلقت.. بحثت , عجنت, خفقت, خبزت, صورت, وكتبت الوصفات بأسلوبي السماحي, والنتيجة كانت زي ما شفتوا (للي حصل على الكراسة).

وللي ما حصل, هون بتلاقوا الكراسة بنسختها الالكترونية..

اهم درس تعلمته من هاي التجربة هو انك اذا بتصمم تعمل اشي, وبتكون بدك اياه من جواتك, الا ما يتحقق بعد ارادة رب العالمين .. انت بس آمن فيه, وآمن بقدراتك ..

والاشي الثاني, لما تحس بهبوط معين لأي سبب كان, ببساطة اعمل اشي بتحبه.. ابدع..

ان شاء الله النسخة الجاي بكأس العالم بتكون مطورة اكثر, وصفات اكثر, نسخ اكثر, بلاد اكثر, أطباق من كل انحاء العالم ومش بس حلويات.. يعني استنوني  كمان سنتين!

شكراً لحسام عليان على الدعم والمرافقة والثقة, شكراً ليزن عبده على التصميم, وشكراً لكل شخص ساهم بالتوزيع..

غلافغلاف 2ايطالياايطاليا 2ألمانياسويسرافرنسافرنسا 2رومانياانجلتراتركياالبرتغالاسبانيا 2اسبانيا

هنغاريا

في بلدي..

في بلدي بتعرفش تميز احياناً بين الدار وبين المجمع التجاري.

في بلدي  بتنافسوا مين ببني دار اكبر واوسع وطوابق اكثر, وبعد كم سنة بستقروا بطابق واحد وبسيبوا الشقة وبلزقوا بغرفتين ثلاث مش اكثر, وما بنوب المرأة الا التعب بتنظيف الشبابيك اللي الله اعلم اذا  لحقوا يعرفوا اصلاً على شو بتطل.. مهو كلهم بعملوا هيك ليش تا انا ما اعمل يعني؟ شو ناقصني؟

في بلدي العروس وأهلها مجبورين يجهزوا البيت مهما كان حجمه, ومهما كانت حالتهم المادية, من اكبر اداة كهرباء  لأصغر علبة تنحط فيها علبة قش الاسنان.. في بلدي عرايس بتتنافس مين جابت اغلى اثاث (للعرض) واكثر طقومة كريستال (للغبرة) .. مهو كلهم بعملوا هيك ليش تا انا ما اعمل يعني؟ شو ناقصني؟ في بلدي بستنوا بيوم “الغراظ” .. يوم الحسم! يوم فحص تطبيق قانون الجهاز. واخ لو العروس  مش مطبقة احد البنود يا ويلها من النظرات والهمسات والوتوتات! اباييي لو انها مش مطلعة علبة الفليت!  ببيدوا ناموس جدها الاول!

في بلدي العروس والعريس بقضوا فترة الخطبة يراكضوا ويجهزوا بلاطياً مطبخياً صالونياً غرفياً نجارياً حدادياً فستانياً , وبنسوا يتجهزوا نفسياً معنوياً حياتياً مرحلياً.

في بلدي بحرقوا المصاري تعبيراً عن الفرح , قصدي شلالات ونوافير النار او ما يسمى بالعربية النحوية الصرفة “زيقوقيم”. مهو كلهم بعملوا هيك ليش تا انا ما اعمل يعني؟ شو ناقصني؟

في بلدي العرس ببدأ قبل اليوم المنتظر بأسبوع, ضيوف لساعات متأخرة, أكل وشرب اصناف اشكال الوان, بتلاقي الضيفة حاملة تفاحة بإيد, وكعكة بالايد الثانية وحبة الشوكلاتة يا دوب زلطتها, وأهل الدار عم بلفوا بصينية بقلاوة مشان واجب الضيافة عيب.. طب الجماعة اكيد متغديين بدورهم مش قاعدين بمجاعة! لا مهو كلهم بعملوا هيك ليش تا انا ما اعمل يعني؟ شو ناقصني؟ في بلدي اهل العرس بوصلوا حفلة العرس طافيين خالصين بدهم مين يحملهم.. الله يخلف عالمكياج اللي بخفي السواد اللي تحت عيون اخت العريس اللي صارلها مش نايمة اسبوع.

بس كمان في بلدي احنا الجماعة اللي  نناشد بالتغيير بس شاطرين نحكي ونطزع بوستات, خايفين نبادر بالتغيير, مكملين بنفس الطريق, واول ما يصير في بيتنا عرس, بنطبق كل البنود التي ذكرت اعلاه بحذافيرها.. مهو كلهم بعملوا هيك ليش تا انا ما اعمل يعني؟ شو ناقصني؟

مهو هيك في بلدي!

كل موسم افراح وبلدي بخير..

IMG_5464