التجربة الهندسطينية

قبل فترة كتبت منشور عن اول فيلم هندي بحضره بحياتي من اوله لآخره.. بصراحة كنت مقنعة حالي, مثل كثير ناس ان الفيلم الهندي هو مجرد اشي طويل طويل, ممل ممل, مليان اغاني وناس بترقص, وكلهم نفس الشكل ونفس الصوت. وكل الافلام نفس القصة المش مفهومة والمش منطقية, وكلها الها نفس النهاية والبطل اللي بموت وبعيش وبموت وبعيش بطلع بالاخر اخو البطلة يا سبحان الله ..متأثرة من فيلم “طير انت” للرائع احمد مكي؟! يمكن.. بس تنكروش كثار منكم ماخدين هاي الفكرة عن الافلام الهندي.

بصراحة امي كانت تحاول تقنعني انه فكرتي غلط كل ما كنت اشوفها بتحضر فيلم هندي وآخر انسجام وبس ضايل عليها ترسم نقطة على جبينها تضامناً.. بس ولا مرة كنت اقتنع. خلص انا مقتنعة انه الفيلم الهندي هو اشي بعمل من مخي مسخرة وخلص.

لحد ما فتحنا مرة  بالشغل محادثة عميقة الها علاقة بالايمان والدين وهيك , وفاجأني احد الزملاء بتوصية على فيلم بتناول اشياء حكيناها بالمحادثة. الصاعقة كانت ان الفيلم هندي! كيف يعني؟ احنا قاعدين بنحكي مضامين كثير قوية ومعقدة وعميقة المفهوم. وانت جاي تحكيلي فيلم هندي؟!

المهم بعد ايام من التوصية تجرأت وحضرت الفيلم. فيلم واحد بس غيرلي كل فكرتي المسبقة. صح فيه اغاني ورقص يعني, وصح طويل بس مليان رسائل وتساؤلات..مليان مليان..

مش رح ادخل بمضمون الفيلم حالياً لأنه بحاجة لبوست موسع.. بس حبيت اوصل فكرة انك مهما سمعت اشياء عن اشي او حدا تصدقهاش الا لما تعطي حالك فرصة تجرب بنفسك. تجربة كاملة من الاول للاخر.

بس بما انه جبنا سيرة الهندي, حبيت اشارك بتجربة هندية بسيطة. طريقة خبز سهلة جداً اصلها من الهند. بس انا بما اني بقدرش بدون اضفاء لمستي, ولمستي فلسطينية. حبيت اضيف للخبز نكهات الزعتر الطازج والجبنة البيضاء اللي لا تخلو منها اي مائدة (او طبلية!) فطور فلسطيني تقليدي.

بس كمان مش هون النقطة, الموضوع اني بعد هالفلسفة والوطنية كلها حضرت الزعترات وفركتهن عشان ادخلهن بالعجينة واعطيها المذاق الفلسطيني, وبالاخر عجنت وخمرت العجينة وتذكرت اني نسيت احط الزعتر! فاضطريت اعمل التجربة الهندية سادة بدون اي تدخل فلسطيني, وثاني يوم عاودت عدت التجربة كمان مرة مع الزعتر اللي ضل يستناني بإخلاص.. هيك صار عنجد معي مش تقولوا تأثرت بفيلم هندي.

img_7757

الطريقة:

لكل كيلو طحين بنحتاج ملعقة كبيرة خميرة, ملعقة كبيرة سكر, ملعقة كبيرة ممسوحة ملح, رشة محلب, كاستين لحد كاستين ونص حليب فاتر, كاسة لحد كاسة وربع لبن يوغورت , باكيت زبدة (100غم) مذوبة, زعتر اخضر طازج او منشف حسب الرغبة.

حوالي 300 غم جبنة بيضاء عربية مفتفتة للحشوة (ممكن بدون, مش اجباري).

نعجن كل المواد, نبدأ بالمواد الجافة بما فيها الزعتر, نضيف الزبدة, اللبن, الحليب. نعجن منيح منيح بطولة الروح لمدة 5 دقائق على الاقل.

بنغطي العجينة وبنخليها تخمر شي ساعة او حسب الطقس.

بنقطع العجينة ل 12 كرة. بنفرد كل كرة شوي على ايدنا وبنحشيها بالجبنة, بنسكرها كمان مرة على شكل كرة بس هالمرة محشية. وبنرقها هي وحشواتها على شكل رغيف. بندهن وجه الرغيف بشوية زيت زيتون.

بنسخن منيح مقلاة على الغاز بدون زيت ولا اشي, بنحط الرغيف من الوجه المدهون, بنستنى دقيقة لحد ما تتكون فقاعات, بعدين بنقلب على الوجه الثاني. بعد شوي بنتفخ الرغيف, بس تنبسطوش كثير لأنه برجع بنفّس.

mde
صورة تلفون – من التجربة الهندية السادة بدون التدخل الفلسطيني بزعتراته

وهيك بنكمل مع بقية الارغفة. سهل جداً وبوخذش وقت. وهيك بنكون جبنا الهند لعندنا وبنفس الوقت ما تنازلنا عن المذاق الفلسطيني..

img_7780img_7794

 

 

 

 

 

 

 

هيّ الحياة ايه غير شوية طبقات؟

بعرفش وين سامعتها هاي الجملة. اعتقد من شي فيلم. هو يعني الجملة مش هيك بس لما جيت اكتب خطرت  ببالي هاي الكلمات..

بس عملياً اذا بنفكر فيها. هي مش كلام افلام. عنجد كل شي حوالينا مكون من طبقات. سواء الاشياء المرئية الملموسة, او الاشياء المخفية. كلها طبقات.

الارض طبقات.. السماء طبقات.. احنا كل على بعضنا كومة طبقات.. كل واحد فينا عبارة عن طبقات مصفصفة فوق بعض.. شكلاً , طبقات عظم ولحم وجلد وطبعاً طبعاً طبعاً يعني دهون.. وطبعاً طبعاً طبعاً برضو الدهون بطبقات!

مضموناً, كمان طبقات, صفات وميزات, ايجابيات وسلبيات, احلام وطموح ورغبات واخطاء وطباع ومخاوف ووساوس وعادات وعُقد وبلاوي زرقا, كلها مصفصفة فوق بعض بطبقات لحتى تكوّن شخصية كل واحد منا..

تاريخاً, كمان طبقات.. مراحل حياة كل واحد فينا هي عملياً طبقات.. ماضيه, الاسود او الابيض او الرمادي عاد هاي كل واحد ادرى بحاله.. الحاضر اللي عايشُه او مش عايشُه برضو كل واحد ادرى بحاله.. والمستقبل اللي بس الله ادرى بطبقاته..

وبما انه احنا بمزاج الطبقات.. بتتذكروا مرة عملنا كرواسون بكريما اللوز؟ (اسم المقالة هون “مشترى العبد ولا تربايته”).

اليوم انا عملت اشي على نفس المبدأ.. عجين طبقات, بس بما انه احنا بموسم الكستناء, قررت اعمل كريما كستناء بدل اللوز.. الطعم جديد وزاكي كثير..

img_7640

يلا بلا حكي زيادة ولت وعجن.. عملياً امبلا عجن اه بلزمنا 🙂

dav

للعجين:

نص كيلو طحين

20 غم خميرة طارجة (مكعبات) او ملعقة كبيرة خميرة فورية.

100 غم  زبدة طرية+ كمان 200 غم للطبقات.

ثلاث ارباع كاسة حليب دافي

ملعقة كبيرة ممسوحة ملح

ثلاث ارباع كاسة سكر

بيضة +صفار بيضتين

img_7588

الطريقة: نذوب الخميرة في الحليب الفاتر. نخفق الزبدة (100غم) مع السكر والبيض والصفار, بنضيف الطحين والملح. بعدين بنضيف الحليب. بنعجن منيح منيح. انا طبعاً بحب العجانة بس اذا فش ممكن بالايد بس بتاخد وقت اطول ومتعبة اكثر.

بنترك العجينة ترتاح شوي. بهذا الوقت بنفرد الزبدة (200 غم) بين ورقتين فرن (ورق الخبيز) وبنرقها لحد ما يصير شكل مربع.

بنفرد العجينة وبنرقها منيح, بنحط بالوسط مربع الزبدة, بنسكر عليه العجينة وبنخبطها كم خبطة بالاشي هذا تبع العجين اللي بترقوا فيه بعرفش شو اسمه عندكم (احنا بنسميه شوبك) عشان نتأكد ان الزبدة وصلت لكل الاطراف. بعدين بنرق العجينة منيح وبنعملها هيك (الصورة من الانترنت):

74797

بنلفها بنايلون وبنحطها بالثلاجة ساعة. بنطلعها. بنرقها وبنلفها على شكل اسطواني.

كمان مرة نايلون, عالثلاجة, ساعة. بعدها كمان مرة بنطلعها, بنرقها, وبنلفها مثل الشكل اللي فوق.

بعدها كمان ساعة بالثلاجة وخلص. بنرقها وبنقسمها قسمين.

بندهن كل قسم بكريما الكستناء اللي هي عبارة عن : 100 غم زبدة نخفقها مع 100 غم سكر, بنضيف بيضتين وبنكمل خفق, بنضيف فانيلا سائلة, 100 غرام كستناء مشوية ومقشرة ومطحونة بالميكسر, وملعقتين كبار نشا. هاي هي الكريما. ممكن نجهزها ونحطها بالثلاجة لما نعمل العجين.

img_7582

بعد ما دهنا الكريما بنلف العجينة على شكل اسطوانة وبنقطعها دوائر (نفس مبدأ السينابون). اذا ضل من الكريما ممكن ندهن شوي فوق كل دائرة, اذا لأ ممكن ندهن بيض مخفوق. بنخبزها بفرن بحرارة 180 لحد ما تتحمر.

عشان احافظ على شكل موحد خبزت الدوائر بصينية مافينز.

صحة وعافية وكل واحد يخلّي بالُه من طبقاته 🙂

img_7633

حُب ال”غير”

بحب الاشي المش تقليدي. اي اشي فيه اشي “غير” يستهويني ويجذبني. بكل شي مش بس بالاكل. باللبس, بالديكورات… بالناس.. بكل شي.

الاشي ال”غير” مهما كان بسيط بس ممكن يغيّر كثير.. ممكن يغير نفسية, يغير طريقة تفكير, يغير حياة.

انا شخصياً حبي للاشي ال”غير” خلاني اتقبل الناس ال”غير” بشكل اسهل.. خلاني اتجرأ افكر بره الصندوق. بالاول بس بمجال الاكل, بس كمان مجالات ثانية بحياتي انعدت, وهربت من الصندوق. لأنه المخ اذا تعود يفكر بطريقة معينة بمجال معين, بيحفظ هاي الطريقة وبسهولة ممكن يطبقها على مجالات ثانية.

طبعاً الاشي ال”غير” مش يعني قصدي اشي مختلف بشكل صارخ.. بالمرة لا. بس قصدي اسمح لحالي اخرج عن المألوف.

فش احلى من ريحة الخبيز بالبيت. خاصة بجو الشتوية, الريحة لحالها بتعطي دفا.. والاحلى لما ما يكون بده مجهود كبير (عكس البوست السابق تماماً) والاحلى والاحلى لما يزبط دايماً. فش مرة عملت فيها خبز بهاي الطريقة الا وزبط فيها وحصل على اطراءات. عشان هيك لازقة بهالطريقة من سنين لدرجة حسيت انها نفسها تتعرف على غيري, ومن هون قررت اشارك الطريقة, اللي قرأتها بوقتها بشي موقع.

طب شو الاشي ال”غير” بهاي الوصفة؟ يعني شكله خبز عادي شو بده يكون فيه غير مكونات الخبز العادية؟

صديقنا ال”غير” , المتألق بهاي الوصفة هو مكوّن جداً عادي, بس عالاغلب متّبع يتقدم جنب الخبز, بعد ما ينخبز ويستوي, اما هالمرّة قرر يحشي حاله جوه العجينة ويعيش معها كل مراحل نموها من الاول لحد ما تنولد من رحم الفرن على شكل خبزة مربربة منغنغة فيها كل مواصفات الخبزة اللي بتحترم حالها.

المكوّن هو الكوتج, اه لبنة او جبنة الكوتج.

المقادير:

5 كاسات طحين

ملعقتين خميرة كبار

نص كاسة ماء فاتر

ملعقة كبيرة ممسوحة ملح

ملعقتين كبار سكر

رشة بيكربونات الصودا (Baking soda)

50 غم زبدة

علبتين كوتج (مش مهم الدسم)

2 بيض

img_7457

الطريقة:

بنذوب الخميرة في الماء الفاتر وبنتركه على جنب.

نخفق الزبدة والبيض والكوتج مع بعض, بنضيف الملح والسكر والصودا, وبعدين بنضيف خليط الخميرة.

بنبلش نضيف الطحين شوي شوي واحنا نعجن (انا بعجن بالخلاط, بس ممكن بالايد, وممكن نستهلك كمية اقل من الطحين) لحد ما تتكون عجينة طرية لينة. هي بتلزق بالايد بس عادي هيك لازم.

بنترك العجينة تخمر بمكان دافي لمدة ساعة. بعدين بنرجع نعجنها بالايد شوي ونتركها كمان نص ساعة.

بنشكلها مثل ما بدنا, ممكن نجدلها, او نعمل خبز مدور زي الهمبرغر او بالطول. فش قانون. عشان هيك كل حدا بطلع معه كمية معينة. انا طلع معي هالمرة 12 خبزة مثل اللي بالصورة.

img_7442

بنتركها بالصينية ربع ساعة تخمر كمان شوي. بعدين بندهنها بالبيض وبنرش سمسم او شو ما بدنا وبنخبزها بفرن حرارته 180 لحد ما تتحمر.

بصراحة بعرفش شو السر اللي بالكوتج اللي بخلّي الخبز “غير”, طعمه غير, ملمسه غير, ريحته غير.

جربوا هالطريقة, وشوفوا شو قصدي ب”غير”..

img_7483

مشترى العبد ولا تربايته

 

بغض النظر اني ضد هذا المثل لأنه كلنا احرار وفش اشي اسمه عبودية,  وكلمة عبيد لازم تنمحى من قواميسنا لأنه كلنا عبيد الله فقط.. بس ياخي بقدرش انكر اني اول ما عملت هاي الوصفة تذكرت المثل.

هيك احنا النسوان, انخلقنا للغلبة. على فكرة ما حدا فرض علينا ولا حدا بتوقع منا زيادة عن طاقتنا, احنا اللي جبناه لنفسينا!

طب مهو في معجنات بالسوق, الاسعار معقولة, والطعم روعة. ليش لازم اغلب حالي بهيك وصفة مركبة بدها وقت ومجهود؟ عشان ايش؟؟

تذكرت نكتة بعثتلي اياها صديقة قبل يومين:

“الكسلانه هي أنثى ذكيه فضلت راحتها و نفسها على كلام من يفتخرون بالمعدلة, فحصلت على العديد من المزايا :
شغالة تخدمها, زوج بجنن ولا يتكل عليها ويلاحق اولاده بنفسه , و الكثير الكثير من  المزايا التي لا تعرفها الا الكسلانات. أما المعدلة  : فهي أنثى اقل ذكاء, فضلت الحصول على كلمة معدلة و هي كلمة لاتغني ولا تسمن من جوع.. فحصلت على عمل ٢٤ ساعه , وزوج اتكالي كسول يغضب ان تأخرت طلباته حتى وان كانت متعبه صحياً … وغالبا ما تكون المعدلة طباخة سباكة كهربائية وصبي مشاوير البقاله وعامل الكراج حتى “علي عبدو” عامل الورشه بتاخذ دوره!! وبا الأخير تتدهور صحياً وتنقلب شكليا من المجهود… وفي يوم وليلة يجحد زوجها كل خدماتها وتضحياتها ومعروفها …
ويتزوج عليها بوحده كسلانه  ويحلف انه ماذاق طعم السعاده ولا عاشها الا يوم ماتزوج هالكسلانه …خلي كلمة معدلة تنفعك !!”

ما علينا, خلي كلمة معدلة تنفعني , وخليني ابلش بالوصفة بلا كثرة حكي.

للعجينة:

نص كيلو وفوقهن كمان ملعقة كبيرة طحين (هيك خاوه)

نص ملعقة كبيرة ملح

4 ملاعق كبيرة سكر

20 غم خميرة طازجة (مكعبات) – اذا فش بنفع تبدلوهن بملعقة كبيرة خميرة عادية.

كاسة ونص حليب فاتر

50 غم زبدة مذوبة

للطبقات: 300 غم زبدة

لكريما اللوز:

100 غم لوز مطحون ناعم

100 غم سكر

100 غم زبدة

2 بيض

ملعقة  ونص كبار كورنفلور (نشا)

ملعقة صغيرة فانيلا سائل

خلينا نجهز هاي الكريما بالاول ونحطها بالثلاجة. هيك: نخفق السكر والزبدة, بنضيف البيض, الفانيلا, لحد ما يتكون مزيج كريمي. بنضيف اللوز والنشا وبنتابع الخفق لحد ما يصير كريما لزجة. عالثلاجة.

لعجينة همّي:

اول شي بنجيب ال300 غم زبدة وبنحطهن بين ورقتين خبيز (ورق الزبدة او ورق الفرن) وبنرقها لحد ما يصير مربع زبدة مفرود. عالثلاجة.

بنذوب الخميرة بالحليب الفاتر وبنتركها شوي على جنب. بنذوب الزبدة (ال50 غم) وبنضيفها للحليبات.

في الخلاط\العجانة بنحط الطحين والملح والسكر. بنضيف عليهن خليط الحليب وبنعجن لمدة خمس دقائق على الاقل.

بنتابع العجن بالايد شوي لحد ما نحس العجينة طرية وناعمة.

بنشكلها على شكل كرة كبيرة, وبنعمل بالسكين اشارة X بنص الكرة.

بنغطيها وبنريحها شوي (لازمها, لانها حتعاني بعدين!)

مش عملنا اشارة x  ؟ طيب, بنبلش نفرد العجينة من كل واحد من اطراف الx  . يعني بصير عندنا عجينة خميلة بالنص, واطرافها مفرودات.  للاسف  كان لازم اصور كل المراحل بس بصراحة ما خطر ببالي اشارك الطريقة.

المهم, بنجيب مربع الزبدة من الثلاجة, بنحطه بنص العجينة على المحل الخميل وبنغطيه بالاطراف الاربعة اللي فردناها. بنرق العجينة منيح عشان تتوزع الزبدة على كل الجهات. بصير معنا مستطيل.

بنعمل من المستطيل 3 طويات هيك: (جبت الصورة من النت)

74797
صورة توضيحية من الانترنت

بنرقه كمان مرة وبنعمل منه 4 طويات هيك:

%d7%a7%d7%99%d7%a4%d7%95%d7%9c-4
كمان صورة من الانترنت

بنغطيه بنايلون وبنحطه بالثلاجة لمدة نص ساعة عالاقل. كل ما كان وقت اطول احسن.

بنطلعه من الثلاجة وبنرجع نكرر عملية الطويات 3 + 4. وكمان مرة عالثلاجة. هو احسن اشي ليلة كاملة. بس بنفع برضو ساعة.

انا بصراحة اعجبتني شغلة الطويات فكملت عملت كمان مرة بس هالمرة طوية اسطوانية. يعني مجرد لفيت العجينة مثل الرول. بالمرة بالمرة مش اجباري. اجتهاد شخصي.

بالاخر هيك طلعت, هي كل الفكرة من هاي العجينة انه تعمل طبقات.

img_5591

بنطلع العجينة من الثلاجة, بنرقها كمان مرة لمستطيل وبنقطعها مثلثات. او بنفع اذا بدنا قطع اصغر نقطع العجينة قسمين ونعمل مستطيلين. بقاعدة كل مثلث بنحط شوي من حشوة اللوز وبنلفها (شكل كرواسون) .. بنرتب الكعكات بصينية وبنخمرهن شي نص ساعة بمحل دافي (طلع معي 12 حبة) بندهن بلطف ببيضة مخفوقة وبنرش لوز مقطع رفيع. بنخبزهن بفرن بحرارة 180 لحد ما يتحمروا. طبعاً بنفع ما تنحشى بالمرة, وبنفع تنحشى اي اشي ثاني. شوكلاتة, حلاوة, تمر. حسب الرغبة.

img_7372img_7351img_7358img_7370

 

طبعاً هي ما طلعت مثل الجاهزة, لأنه هناك بستخدموا ماكنات للعجن وماكنات للرق, واكيد في اسرار بنعرفهاش.. بس انا حاولت. مش معدلة وقاتلتني هاي الكلمة؟! خليها تنفعني.. وانتو انسوا الموضوع ولا كأنكم سمعتوا اشي ولا كأنكم شفتوا المنشور من الاساس.

يلا باي 🙂