اللهم بلغنا رمضان!

الي فترة بشم  ريحة رمضان كتير, خاصة مع النسمات المرافقة لأذان المغرب, بحسها مشبعة بريحة الشوربة والفلافل وعصير التمر الهندي, ومعبقة طمأنينة وامان وخير وكرم.

انا ورمضان (الشهر!) قصة حب قديمة تربيت عليها من طفولتي. ولا مرة بتذكر اهلي تثقلوا منه او من الصيام او من كل شي مرافق هالشهر الكريم. طول عمره رمضان بالنسبة الهم كان متعة, حتى ابوي كان دايماً يبكي ليلة العيد على فراقه, احنا فرحانين عالاواعي وبنستنى العيدية وهو بعيّط قال!

الصراحة مكنتش افهم سبب هالدموع وانا صغيرة, بس لما كبرت, وخاصة بالخمس سنوات الاخيرة, صرت احس بمعنى رمضان عنجد. بعرفش كيف افسر الاشي, بس كله على بعضه فيه اشي روحاني صحي اجتماعي مميز..

انا واعية لصعوبة رمضان بالصيف, بس من وقت ما بلشت اهتم بمضامين ما يسمى بالتنمية البشرية (المضامين الواقعية مش هديك اللي بتوديك عالبحر وبترجعك عطشان اكثر من واحد صايم!) صرت اطبق مبدأ انه اذا بتقدرش تغير اشي على الاقل غيّر نظرتك اله وطريقة تعاملك معه, هيك بتسهل على حالك كثير, لما تخطر ببالك سلبيات اشي معين, حاول رأساً تشوف الايجابيات اللي فيه.

وهو في اكثر من ايجابيات رمضان؟!

وبما اني الي فترة شامة ريحة رمضان بسلطاته وحلوياته وشورباته, فكرت اني اعمل اشي عشان اعيش الجو عنجد, بس ما حبيت اعمل اشي من الحلويات اللي بتميز رمضان عشان ما احرق طعمها, سبحان الله طعمها برمضان غير.. القطايف وجماعتها..

فقررت اعمل اشي بسيط وسهل, يمشي مع قهوة الصباح او شاي المساء, بس فيه نكهات رمضانية. كعكة اسفنجية هشة وخفيفة بنكهات الفستق الحلبي وماء الزهر.

IMG_5412

واليكم الطريقة:

المقادير:

5 بيضات مفصولة

كاسة سكر

نص كاسة ماء (او حليب) مع قطرة ماء الزهر

نص كاسة زيت

باكيت بيكينغ باودر

باكيت سكر فانيل او ملعقة فانيلا سائلة.

كاستين طحين

صبغة طعام خضراء (مش اجباري)

كاسة فستق حلبي (كمان مش اجباري اذا الميزانية بتسمحش! بنفع بدون)

للتزيين:

علبتين شمينت حامضة (مفضل الثقيلة)

3 ملاعق كبيرة سكر ناعم

3 ملاعق كبيرة بودرة سحلب (انا استخدمت باكيت كامل –الزهراء)

IMG_5439

الطريقة:

نخفق صفار البيض مع نص كاسة سكر, نضيف الفانيلا, الزيت, ونخفق لحد ما يتكون مزيج كريمي. نضيف الطحين والبيكينغ باودر والماء ونتابع الخفق.

نخفق البياض مع نص كاسة سكر لحد ما تتكون كريما منفوخة.

نضيف خليط البياض على خليط الصفار ونحرك يدوياً.

نضيف الصبغة والفستق الحلبي (زي ما حكيت ممكن نتخلى عن هاي المرحلة)

توضع في قالب مستدير (26) مدهون بالزيت وتخبز بحرارة 180 لمدة 45 دقيقة.

بعد ما تبرد , نحضر خليط التزيين بواسطة خلط جميع المواد, وبنصبها فوق الكعكة.

تزين بالفستق الحلبي المطحون (بس كمشة مش محرزة يعني, تتنازلوش عن هاي المرحلة).

صحتين وعافية, واللهم بلغنا رمضان!

IMG_5428

IMG_5415

سمارتوت كيك

مرة زمان طلعت بمبادرة “غبية” (موجود عنها منشور بالمدونة هون) وهي اني اسكر تلفوني ساعة باليوم, كل يوم.

وسميتها   fool hour (حتى الفول زعل مني بس تصالحنا :)) ساعة “غباء”  بما انها بدون هالسمارتفون او التلفون الذكي.. او زي ما انا بسميه “سمارتوت” (ما حدا يقول من الكلمة العبرية! ما حدا يفهمني صح!) ..بصراحة المبادرة ما اخذت اعجاب واقبال, وبصراحة اكثر انا مشيت عليها كم شهر لحالي وبعدين انهزمت..

بس ضليت حاسة بأنه السمارتوتات مسيطرة علينا زيادة عن اللزوم, صح هي مهمة وسهلت علينا حياتنا بكتير معاني, ولا غنى عنها, بس برضو سلبت منها كتير اشياء.. يمكن مش الكل منتبه الها, بس اللي بدقق بالاشياء اليومية اللي بنعملها, بفهم عن شو بحكي.

لذلك قررت اجرب يوم كامل بدون سمارتوت. اخترت طبعاً يوم اجازة عشان شغلي ما يتأثر بما انه صرنا ندير كل اشغالنا عن طريق هالجهاز اللي صار مكتب متنقل..

سكرته الخميس بالليل, وبلشت يوم الجمعة بدونه..

هدفي من التجربة ما كان اني اثبت انه بدون تلفون ممكن انظم وقتي اكثر, لأني بصراحة والحمد لله منظمته حتى بوجود التلفون, كل شي اله وقته.. بس  وجود التلفون بخلفية كل نشاطاتي اليومية من ابسطها لأعقدها اشعل فضولي اني افحص تأثيره عليها..

وفيما يلي استنتاجاتي..

اولاً, التركيز.. وجود السمارتوت بيفقدنا التركيز. نقطة.

مهما كنت انسان دقيق وعندك قدرة تركيز, صعب تحافظ على هاي الصفات لما تجيك رسالة واتس اب وتبدأ بمحادثة, وتنتقل لغيرها, وترجعلها. وترجع تعمل شغلك, وتعاود ترجعلها, ولغيرها, وانت تقرأ غيرها تجيك رسالة فيسبوك, تفوت وتحاول ما تبدأ محادثة وتعتذر لأنك مشغول, بس شو الفايدة, صرت فاقد التركيز, وبما انك فقدته خلص بتفوت عالفيس وبتقرأ الاشعارات وبتبلش تضيع وقت.. وهون ذكرت تطبيقين بس, احياناً بيجتمع كل قوم التطبيقات اللي عندك عالسمارتوت وبقرروا يشنوا حملة اشعارات عليك بنفس الوقت..

هو انا بصراحة كثير بطنش نداءات السمارتوت اذا بكون منهمكة في عمل معين, بس خلص لمجرد انها موجودة بفقد التركيز..

ثانياً, ويعتمد على اولاً, الاتقان.. العمل اللي برافقه عدم تركيز ما بيكون متقن زي مهو لازم.. سواء كان عمل فنجان قهوة ساذج او كتابة اشي معقد..

ثالثاً, ويعتمد ايضاً على اولاً , انجاز المهام بوقت أطول. المهمة اللي المفروض تستغرق معك ربع ساعة بتستغرق ساعة بوجود ازعاجات السمارتوت. عادة يوم الجمعة عندي بيكون يوم مضغوط.. بس هالجمعة  كان عندي حتى وقت فراغ مع اني عملت اشياء اكثر من اي جمعة عادية..  وانا قال اللي كنت مفكرة حالي عارفة انظم وقتي قال!

رابعاً, الراحة النفسية والنَفَسية. مش عارفة اذا ممكن اعرف اوصف الاشي, بس هيك عشت يومي بدون توتر وشحنات وحتى انتبهت انه تنفسي منتظم اكثر! (شو خص؟! بعرفش!)

خامساً, عيش اللحظة وهي سخنة..

يعني مثلاً متعودة اصور طبخة الجمعة وابعثها على مجموعة اهلي بالواتس (مش عالفيس!) ومن تعليق لتعليق بضطر آكلها باردة وبستمتعش ..اليوم لا..  هو صح طبخت منسف وبصراحة متعودة لما احرك اللبن امسك السمارتوت بالايد الثانية واتسلى بهالوقت بما انه طويل, فيسبوك, بينترست, اينستا اي حاجة. هالمرة اضطريت اسرح بعقلي واتأمل بكثييييير اشياء واستغفرت 100 مرة كمان! يا جماعة يحرق حريش هالسمارتوت مش معطينا مجال نتأمل ونتخيل! ويحرق حريش هاللبنات اتاريهن بطوّلن تا يعقدن! (واذا انت مش فلسطيني معظم الاحتمالات انك ولا فهمت اشي من اخر جملة!)

خلصت التجربة, ورجعت فتحت السمارتوت طبعاً لأنه لا غنى عنه, مليان ايجابيات وتسهيلات, بس وعدت حالي اني لازم بين فترة وفترة اعطيه واعطي نفسي استراحة. تتخيلوش قديش هاليوم كان مريح وهادىء.. حسيت فيه بحرية من نوع غريب..

وعشان انا مبسوطة من حالي, قررت اكافئ نفسي بكعكة بلوني المفضل. سميتها سمار توت كيك.

IMG_5029

الطريقة:

للقاعدة: 200 غم بسكوت مربع (بيتي بير) مطحون, مخلوط مع 70 غم زبدة مذوبة (مرات الكمية بتتغير, المهم يكون عندكم خليط متماسك). بنفردها بصينية مستديرة قطرها 26 وبنحطها حالياً بالفريزر (انا عملتها بعدة قوالب صغيرة).

للكعكة: نذوب ملعقة كبيرة جيلاتين في نصف كاسة ماء وبنخليها على جنب.

بهالوقت نخفق 2 كريما خفق (شمينت متوكا) مع 1 بودينغ فانيل وقبل ما تتماسك بنضيف 500 غم لبنة 5 او 9%, 1 شمينت حامضة , قشرة نصف ليمونة مبشورة, نصف علبة توت ازرق blue berries معلب, وممكن بضع قطرات صبغة طعام بنفسجية (مش ضروري لأنه التوت بيعطي لون).

بنسخن خليط الجيلاتين شوي وبنضيفه لخليط الكريما, بنديره فوق القاعدة وبنحطه بالثلاجة يتماسك.

بهالوقت بنعمل الطبقة الاخيرة. ممكن ببساطة نستغل نصف علبة التوت الباقية, نضيف عليها شوية مي وجيلاتين ونحرك ونديرها عالكعكة.

بس انا عملتها بطريقة ثانية, جبت علبة توت ازرق مفرز (تباع بالسوبر ماركت) ضفت عليها 100 غم سكر بودرة وطبختها عالغاز شوي لحد ما صارت الفواكه طرية, طفيت الغاز وضفت نص كاسة مي مع ملعقة صغيرة جيلاتين, لما برد الخليط درته عالكعكة.

IMG_5040

مفضل الكعكة تبات ليلة بالثلاجة عشان تتماسك..

صحتين وكل سمارتوت  داي وانتو بخير..

IMG_5034

الوحش الاخضر

انا والشاي الاخضر مش اصحاب بالمرة.. يمكن حتى اعداء.

بس كل ما اشوف قديش هو مفيد للقلب, للمخ, لضغط الدم, للوقاية من السرطان, للكبد, للمفاصل… طب يا عمي بلاش هاي, قديش هو مفيد للتنحيف (مهو مش فارقة اصلاً انا مش ناصحة ابداً ابداً.. ابداً),  للوقاية من الشيخوخة (عادي اصلاً التجاعيد احلى, مكياج طبيعي), بقرر بيني وبين نفسي اني لازم الغي هاي العداوة..

بحاول ارجع اشربه, بس بعد رشفتين ثلاث بوقف,  بحس حالي بشرب ملوخية بالحناء!

كل طرق الصلح باءت بالفشل, حاولت اشربه لما اكون مبسوطة بشكل خاص او بعد انجاز معين يمكن هيك يرتبط بمخي بالاشياء السعيدة وبالتالي  طعمه يصير زاكي. عالفاضي, بالعكس مرة شربته وانا اقرأ كتاب شكر مميز وصلني على شغل معين, حسيت حالي بقرأ مسبات مش اطراءات من تحت راس طعمه المستفز!

حاولت اجيب شاي اخضر بنكهات مختلفة, بس اولاً هيك بفقد من قيمته الاصلية, ثانياً والاهم الا ما بشي مرحلة طعمه يطغى على طعم النكهة الثانية , بحسه طلعلي من الفنجان على هيئة وحش اخضر مع قرنين وعصا بشوكتين “هع هع هع هتروحي مني فين!”

طيب خلص مش ضروري اكون متصالحة مع كل شي بالدنيا, مش شرط احب كل شي, مهو مش كل شي بحبني.. بس لا, انا بعرفش اكون على عداوة مع اشي, خاصة لما يكون اشي منيح. هو اه منيح, بس مش طيب 😦

ممنوع ايأس ! لازم ادور على طريقة تحببني فيه لازم!

اجت!

كعكة!

اه اه كعكة! في حدا بحبش الكعك؟! كعكة شاي اخضر وشو يعني؟! هو بس انكتب عالشوكلاتة والفواكه تنعمل كعك؟! ليش والباقي شو ناقصهم؟ لوينتا بدنا نضل مربعين احنا ومتمسكين بالمألوف والمعروف؟! يلا نفكر بره الصندوق؟ قصدي بره القالب؟! يلا..

خلص هذا هو الحل الوحيد.. كعكة شاي اخضر.. توكلنا على الله.

بس بما انها تجربة اولى لازم اعمل اشي خفيف ومع نكهات متجانسة. قررت اعمل سويسرول بطعم الشاي الاخضر محشي بكريما بطعم الليمون.. مرار على حموضة مع حلاوة.. شاي اخضر, ليمون, بتوقع اختيار موفق, بس ناقصنا نعناع وبتكمل الفرحة..

IMG_4847

المقادير:

للكعكة:

7 صفار بيض

3\4 كاسة سكر

ملعقة صغيرة فانيلا سائلة

ملعقة كبيرة عصير ليمون

قشر نصف ليمونة مبشور

5 بياض بيض

كاسة طحين

ملعقتين كبار بودرة شاي اخضر(اتوقع موجود عند العطار, انا جبته من خارج البلاد, بتعرفوا يمكن عشان مستورد استحي منه وأحبه!)

للحشوة:

1 كريما خفق (شمينت متوكا)

1 بودينغ فانيل

250 غم لبنة 9% او 5%

عصير نصف ليمونة +قشرها مبشور

الطريقة:

للكعكة: نخفق الصفار مع نصف كاسة سكر والفانيلا والليمون لحد ما يتكون مزيج كثيف.

نخفق البياض مع باقي السكر لحد ما يصير كريما كثيفة منفوخة. بنضيف هذا المزيج لمزيج الصفار, بعدين بنضيف الطحين والشاي (مفضل مع تنخيل) وبنحرك (يدوي مش بالخلاط بلا كسل).

بنصب المزيج في صينية فرن (العادية الكبيرة) مفرود فيها ورقة خبيز (ورق زبدة) لازم الخليط يغطي كل الصينية.

نخبزها في فرن حامي (200-210) لمدة 10 دقائق فقط.

للحشوة: نخفق المواد لحد ما تتكون كريما كثيفة. مفضل نتذوق ونحسن النكهات.

بعد ما طلعت الكعكة الخضراء من الفرن بنستنى شوي لتبرد, بعدين بنقلبها على فوطة مطبخ, بندهن الحشوة وبنلفها زي الرول. بنبردها في الثلاجة وبس بعدين بتتقطع.

طيب..

هو يعني مش كتير طيب..

اضحك عليكم واقول اني حبيتها؟ انها نجحت تحببني بالشاي الاخضر؟! بالمرة لا.. هي كعكة عادية واللي بحبوا الشاي الاخضر حبوها, بس انا مع كل لقمة كان يطلعلي هداك الوحش الاخضر ابو هع هع هع :\

بس على الاقل حاولت.. واثبتت حسن النوايا والرغبة بالصلح..

المهم, شو مع البياضين اللي ضلوا؟ (هذا اذا انتبهتوا انه استخدمنا 7 صفار و 5 بياض)

ممكن تضيفوا الهن كم قطرة ليمون وتعملوهن قناع شد للوجه. هاي الوقاية من الشيخوخة بلا شاي اخضر بلا هم 🙂

IMG_4814

مهو احنا بنكمل بعض !

IMG_8771لكل شخص فينا مزايا خاصة بتميزه عن غيره.. انا بآمن وبشدة انه فش انسان على وجه الكرة الارضية فش عنده ولو صفة واحدة مهما كانت ثانوية او بسيطة او صغيرة, بس بتخليه انسان مميز عن غيره.. في ناس الاشي عندهم بارز, وفي ناس اقل, وفي ناس بعرفوش اصلاً انه هاي الميزة فيهم..

صحيح انه كل واحد بحب يبرز مزاياه بشكل فردي ويحصل على كل الاطراءات.. هاي طبيعة البشر عادي.. يعني مثلاً اذا انا اندعيت لتقديم فقرة معينة بنشاط معين عن اعداد الحلويات, اكيد بفضّل اكون لحالي واكوّش على الساحة .. بالعربي بدي اوخذ مجدي يعني!

(*مجدي = “المجد الخاص بي” ها , احسن لحدا يفكر اشي ثاني!)

مع انه لو نفكر فيها شوي, لو يدعوا معي شخص من مجال ثاني, ممم التصوير مثلاً! ممكن نعمل فعالية مشتركة تشمل اولاً اعداد الطبق (انا) وبعدين طريقة تصويره بشكل مهني(هو)! Two in one! وهيك نخلي الاشي مميز, جديد, وجذاب.. وكمان بخف عني الحمل والمسؤولية.. يعني مش شرط وجود حدا معي انه يسرق الانتباه من وجودي.. او يهدد نجاحي.. بالعكس, كل واحد ومكانته ودوره بهالنشاط, وبهالحياة..

احنا بهالحياة بنكمل بعض واحنا مش عارفين.. او بدناش نعرف.. لأنا انانيين بطبعنا.. بس لو نعطي حالنا الفرصة نوسع دائرة التفكير شوي, ممكن نوصل لأفكار جديدة وغير تقليدية, مع بعض.. لأنه احنا.. عنجد بنكمل بعض.. مش بنهدد بعض..

طيب.. عادة احنا متعودين نعمل كعك مع تمر, وكعك مع جوز.

انا هالمرة عملت كعك مع تمر وجوز مع بعض! سموه كسل, سموه قلة حيلة, سموه توفير.. بالنسبة الي التمر والجوز ممكن بكل بساطة يكملوا بعض! وبكفيهم عاد عايشين كل واحد لحاله.. كل واحد منهم اخذ مجده على مر السنين..بعرف انه كتار منكم عملوها بس انا هون هدفي نذوّت الموضوع من باب “احنا بنكمل بعض”.

لما انا اضيف الجوز للتمر, بحصل على طعم جديد, او عملياً على اكثر من طعم..

بنفس اللقمة ممكن احس بحلاوة التمر و بمرارة الجوز..

بسلاسة ونعومة التمر, وقساوة الجوز..

بسهولة بلع التمر وصعوبة زلط الجوز..

*تعريف الجوز في ويكيبيديا: ثمرة الجوز هي ثمرة قابلة للاكل تنتمي لإحدى أشجار جنس الجوزيات.

يعني ها احسن لحدا يفكر قصدي اشي ثاني بالجوز انتِ وياها ما صدقتن! مرارة وقساوة ومش عارفة شو.. انا مقصدتش حاجة!

باختصار, هيك انا بكون كمان وفرت وقت ومجهود بعصر هالسرعة, وكمان حصلت على طعم زاكي..

وعلى فكرة, لما يكون عندك استعداد للتعاون والتبادل, ويكون عندك انفتاح لاشياء حتى لو مش لحالك البطل فيها, بتنفتح قدامك فرص وامكانيات زيادة كمان من حيث لا تحتسب, يعني مثلاً, لما خلطت الجوز مع التمر, عمتو طحينة  شمت الخبر والريحة  وقالت “يا باطل! وانا وين رحت! على فكرة انا ممكن اضيف نكهة غير شكل لخليط التمر والجوز انتِ بس جربيني! احنا ممكن نكمل بعض”.. 🙂

كعك سريع بالتمر والجوز.. والطحينة:

IMG_8758

للعجينة:

3 كاسات طحين كعك, او طحين عادي مع ملعقة صغيرة مسحوق الخبيز Baking powder.

100 غم سكر ناعم

ملعقة صغيرة فانيلا سائلة

نص كاسة حليب

صفار بيضتين

200 غم زبدة بحرارة الغرفة مقطعة الى مكعبات

للحشوة:

ثلاثة ارباع علبة تمر للتدهين.

3 ملاعق كبيرة طحينة

كاسة جوز مطحون

رشة قرفة (مش اجباري)

الطريقة:

للعجينة: تعجن جميع المواد بالخلاط (الزبدة, السكر, البيض, الفانيلا, الطحين, الحليب) حتى الحصول على عجينة طرية, تقسم الى قسمين. يفرد القسم الاول في صينية مربعة مدهونة(مش صينية فرن من الكبار, هاي الكمية لصينية بايركس عادية) ويخبز بحرارة 180 لمدة ربع ساعة.

نخلط التمر والطحينة وندهنها فوق العجينة المخبوزة, نرش الجوز والقرفة.

نفرد القسم الثاني من العجينة فوق الحشوة, نغزها بالشوكة, ونخبزها لحتى تشقر.

بعد ما تبرد تقطع الى مربعات صغيرة. هاي الكمية مبين قليلة بس بتعمل اشي زي 40 مربع صغير.

صحتين والف عافية, وكل عام وانتم بخير..

IMG_8779

هي هاي.. التوقعات اللي مش بمحلها..

هذا يا جماعة الخير عملت 3 كعكات لمناسبة معينة.. انا من النوع اللي بحب يخطط ويكتب قائمة مشتريات وينظم الوقت..فيعني اكيد حدا بعطي كل هالاهتمام كمان اكيد بخصص وقت انه يتخيل شكل العرايس الحلوات الثلاث كيف رح يطلع.. مين مرتبة ومين متكتكة ومين مكياجها زابط ومين موديل شعرها بده يفضحني بشي مرحلة!!!

حضرت قائمة الاغراض, وتقسيم الوقت, وسميت بالله..

"موس توقعات", "موس عياط"؟

“موس توقعات”, “موس عياط”؟

كعكة بلاك فورست عادية.. بصراحة من كتر ما بعملها بطلت حتى اتوقع منها اشي هاي..لا منيح ولا عاطل..

الكعكة اللي تخيلت انها ما تزبط وتفضحني, كعكة جديدة نوعاً ما, ما فكرت ولا مرة اعمل كعكة بطيخ! اه عادي يعني شو فيها.. طبقة بسكوت زبدة وفوقها كريما بطعم البطيخ وفوقها شرحات بطيخ رفيعة ملمعة بمسحة Glaze.. يا عروس يا اللي بتلمعي انتِ!! خفت منها هاي تيجي تقول “في حدا عاقل بعمل كعكة بطيخ! البطيخ انخلق عشان يتاكل مع جبنة بيضاء وبس! شو بتخبص فيي هاي البنت!؟”

اما حبيبة قلبي الغالية الله يسعدها اللي توقعت انها تكون ملكة الحفلة وارفع راسي فيها فوق فوق, هي كعكة طبقات موس .. اشي فاخر عالاخر..

ربع ساعة قبل الموعد.. بدي “افنش” العرايس عشان اركبهن بالسيارة وتطلع الزفة..

البلاك فورست.. سمرا ونغشة ودمها خفيف.. كل شي تمام, اركبي.. لولولولليييييش!

كعكة البطيخ.. بسم الله.. يا رب.. يا رب .. خلص ماكسيموم بلا منها هاي بكفي تنتين مش مشكلة.. كل شي بالدنيا نصيب..

بس لا! الحمد لله رب العالمين! على عكس التوقعات زابطة وثابتة وبتلمع وكل شي تمام.. اركبي.. لولولوليييييش!

دور حبيبة قلبي.. رفعت القالب, نزعت الشريط الشفاف من حول خصرها.. يا لهوي!!!

العروس موس بلشت تعيط وهات توقف!! وانا على وشك اعيط معها !

مهو انا فالحة وفصحة كتير.. قال بدي اتفلسف واضيفلها طعم, حطيت صوص التوفي (سائل جاهز من السوبر ماركت) بين الطبقات.. الاخ طلع حساس شكله ما استحمل مشاعر طلعة العرايس قام فلت بالعياط وطلع من كل الجهات..

الكعكة تعيط.. وانا اعيط!! بلشت امسح دموعها اللي مش باينلها نهاية, ودموعي بالمرة.. دموع الخيبة.. التئيلة أوي 😦

رجعت لبستها الشريط الشفاف, وفوقه القالب, رمقتها نظرة حزن وزعل.. وحطيتها بالفريزر.. تركبيش! فش عرس!

صح هالشي بصير معنا بكتير جوانب بحياتنا, مع ناس, مع احداث, مع اماكن؟ ياما توقعنا.. وياما خاب املنا.. او العكس..

خلي توقعاتنا تكون منطقية, واقعية, وبعقل.. بلاش نتحمس للاشي زيادة, وبلاش نحكم عالاشي بالفشل قبل ما نجربه.. الاراء المسبقة ذابحتنا ذبح !

المهم, الكعكة ما انزفت.. ولا تهنت بعرسها.. بس بعد 3 ساعات تفريز.. دموعها نشفت.. قصدي تجمدت.. وعملنالها سهرة بسيطة  عائلية هيك عالسكيتي..

كعكتي لليوم بدي اسميها “موس توقعات” او “موس عياط”.. اختاروا انتو 🙂 وهاي الطريقة.. بس بدون صوص التوفي الله يرضى عليكم!!

المقادير لقالب مستدير متحرك قطر 26

للقاعدة:

المقادير:

2 بياض بيض

3 ارباع كاسة سكر

كاسة جوز مجروش

3 ملاعق كبار كاكاو

نصف ملعقة صغيرة سائل فانيلا

نخفق بياض البيض مع السكر والفانيلا لحد ما نحصل على مزيج كريمي, نضيف الكاكاو ونكمل خفق كمان شوي, بالنهاية نضيف الجوز ونقلب بملعقة خشبية حتى يتخلط منيح مع الباقي.

نفرد الخليط في قالب مدهون بزبدة او زيت, ونخبزه بفرن حرارته 180 لمدة 15-20 دقيقة. بعدين بنتركه يبرد بحرارة الغرفة.

لطبقة موس الشوكلاتة:

مفضل تنعمل قبل بيوم او قبل كم ساعة من كل العملية.

2 كريما خفق

200 غم شوكلاتة مرة

1 كيس جيلاتين (يحضر حسب التعليمات)

نسخن على الغاز او الميكرو 1 كريما خفق, نصبه على الشوكلاتة بعد ما قطعناها قطع صغيرة. نحرك لحد ما نحصل على مزيج “شوكلاتي”. بعد ما يبرد شوي بحرارة الغرفة بندخله الثلاجة طول الليل او 6 ساعات.

نخرج الخليط ونخفقه في المكسر ونضيف باكيت الكريما التاني. ونخفق لحد ما نحصل على كريما , نضيف الجيلاتين ونحرك. نصب الخليط فوق القاعدة, وتدخل الثلاجة عشان تشد حالها شوي قبل استقبال الطبقة الثالثة.

لطبقة موس التوفي او Dolce de leche

250 غم توفي

1 كريما خفق

500 غم لبنة حلوة 9%

1 بودينغ توفي (او فانيل ممكن).

نخفق الكريما مع البودينغ, نضيف التوفي, واللبنة. وبالاخر الجيلاتين. تصب فوق طبقة موس الشوكلاتة.

للتزيين- غناش شوكلاتة.

1 كريما خفق

200 غم شوكلاتة مرة

50 غم شوكلاتة بنية عادية.

تسخن الكريما عالغاز او بالميكرو, وتصب فوق الشوكلاتة. نحرك حتى نحصل على خليط متجانس. يصب فوق الكعكة.

تزين حسب الرغبة. واحلى اشي تضل سادة بدون تزيين.. مهو العروس ببساطتها مش بعجقتها 🙂

صحة ومليون عافية ودامت الافراح معبية دياركم..

بس ما حدا يجيب سيرة العياط.. اكتفينا 🙂