بكره الرياضيات! طَ؟

عادي بتوقع كثار مثلي.. بصراحة الناس بتستغرب الاشي بما اني كنت الاولى على صفي طول عمري. في مخ يعني. يعني مش حلوة بحقي ما اكون شاطرة بالرياضيات. بس لما كبرت ادركت اني مش مجبورة احب كل شي ومش مجبورة اكون شاطرة بكل شي, طَ؟

سمعت مرة انه الشطارة بالرياضيات او عكسها هو اشي وراثي. يمكن في منه لأنه ولا حدا من اهلي بحب الرياضيات بشكل خاص. مع انه هوايتنا كلنا حفظ تواريخ الميلاد بشكل غريب, قريب غريب حافظين تاريخ ميلاده. وتاريخ الميلاد ارقام يعني والارقام رياضيات بس مع ذلك بنحبش الرياضيات طَ؟

بس حتى لو الاشي مش وراثي. انا تحليلي لعدم حبي للرياضيات هو انه بالنسبة الي (الي ها بس! مش يزعلوا عشاق الرياضيات!) مادة ناشفة فش فيها احساس, فش فيها عامل انساني.. فيها مخ اه, بس فش فيها عاطفة. مش مثل الادب واللغات والتاريخ.. اللي هي المواد اللي بنجذب الها اكثر.. مجرد تحليل.

قبل كم يوم احتفلوا العالم قال بيوم الباي او ال “ط” يعني هاي الاشارة π. 

اللي هو يعني ثابت رياضي او النسبة بين محيط الدائرة وقطرها او اشي من هالنوع. طب انا مالي انا؟ انا الرياضيات كلها مش طايقتها بدكم اياني احتفل بواحد من اولادها؟ تحلموش طَ؟

هو انا ممكن احتفل بال “ط” اللي هي مصطلح انا بستخدمه كثير بمعنى “طيب”؟ او ممكن احتفل بال”باي” اللي هو نوع حلويات. اما اشي ثاني لا!

نعمل نوع باي مختلف هالمرة طَ؟ يلا.

باي التفاح المقلي  (الطريقة اخدتها من موقع انترنت):

للباي: عمليا بدنا نعمل اشي مثل الكريب: كاسة طحين, كاسة ونص حليب, 2 بيض, ملعقة كبيرة سكر, ملعقة صغيرة زيت ذرة. نخلط المواد مع بعض لحد ما تتكون عندي عجينة سائلة. نترك نص الكمية على جنب كمان شوي بتعرفوا ليش, والنص بنقليه بمقلاة ساخنة بدون زيت ولا اشي, على مراحل, كل مرة بنسكب كمية مقدار مغرفة شوربة بالمقلاة, دقيقة وبنقلبها على الوجه الثاني. يعني مثل الكريب او البانكيك. هيك لحد ما نخلص كل نص الكمية.

للحشوة: 4 تفاحات مقشرات ومقطعات مكعبات, بنحطهن بطنجرة على الغاز مع 40 غرام زبدة و4 ملاعق كبيرة سكر (مفضل بني بس بنفع عادي), لحد ما تصير المكعبات طرية. رشة قرفة وهيك الحشوة جاهزة.

بنحشي كل قرص كريب بمقدار من الحشوة وبنلفها, بنسكر الاطراف بشوية من العجينة اللي ضلت ما استعملناها يعني بنستعملها كأنها لاصق.

بعد ما حشينا كل الكريبات (العدد حسب حجم المقلاة – انا طلع معي 7 كبار) بنغمس كل قطعة كريب محشية بالعجينة السائلة اللي ضلت, وبعدين بنكون مجهزين صحن فيه بسكوت مطحون (بسكوت شاي مربع عادي- بيتي بير) بنغمس فيه الكريب المحشي. مثل طريقة الشنيتسل بالضبط.

بنقلي الكريب المحشي بزيت غميق بس لحد ما يتحمر, مش كثير بلاش ينحرق البسكوت.

وكل سنة وكل باي سالم وبألف خير.

يلا باي.

بعرف عشاق الثلج يمكن يزعلوا مني على هالمنشور بما انهم من اول الموسم نفسهم بثلجة مزبطة وانا ادعي يا رب لأ يا رب لأ وكل مرة الله يستجيب لدعائي. ما تفهموني غلط, مطر اه, ثلج لأ. خير اه, حشرة بالبيت لأ. ارتفاع منسوب المياه اه, تجمد مزمن بأطراف اصابعي لأ ثم لأ ثم لأ.

بس مش هون موضوعنا, بالنهاية هاي اذواق وشخصيات وميول. هو يعني انا مستحيل افهم شو المتعة بالثلج. عشان البياض يعبي الدنيا يعني؟ بسيطة. راس مالها كم متر قماش ابيض افرشوا الدار وتمرمغوا فيه. عشان بتحبوا تلعبوا فيه يعني؟ بسيطة. عبوا الفريزر مي وجمدوها وبلشوا ارموا على بعض. او اشتروا من هاي الاشياء اللي برشوها بالاعراس وخلصنا!

مع ذلك, قلت اذواق. وانا بحترم اللي بحبوا الثلج, بس برضو ان شاء الله ما تثلج السنة. يا ريت القلوب هي اللي تبيض مش الدنيا يا جماعة الخير..

المهم, اللي كنت حابة اقوله هو انكم شايفين كيف كنتوا تبنوا امال على توقعات الارصاد الجوية؟ تحضروا حالكم, وخاصة نفسياً, وبالاخر التوقعات ما تتحقق؟ ايوه بالضبط اوعكم تعملوا هيك بحدا. طبعاً هاي الارصاد بإيد رب العالمين بس اكيد. لكن انا قصدي اقيس على ذلك. بحياتكم ما تعشموا حدا بإشي وتفلخوا (هي تهربوا بالعربي بس مع شوية خِسّة!) بحياتكم ما تخلوا اللي قبالكم يبني امال على كلمة قلتوها, وتطلعوا بالاخر بتضحكوا عليه. هي مجرد كلمات يمكن, صف حروف بالنسبة الكم, بس بالنسبة لغيركم هي ممكن تكون حياة. ديروا بالكم.

وبما انه ذكرنا سيرة الثلج اللي تعشمتوا فيه وما اجى, نعمل اشي يراضيكم؟ كعك الثلجيات! كعكات مليااااانة شوكولاتة ومخبوزة بالسكر الناعم ومن هون اجى اسمها.

الطريقة بسيطة نوعاً ما بس بصراحة بدها وقت ومعمولة على مراحل. انا كنت بين كل مرحلة ومرحلة انجز اشياء ثانية بالبيت. فش وقت ضائع..

يلا بسم الله.. اول شي بنجيب شوكولاتة مرة (حوالي 3 باكيتات ونص من شوكولاتة البقرة – عادي هيك اسمها يعني بغلطش – اللي ورقتها بنية يعني اشي زي 350 غم) مذوبة مع نص باكيت زبدة (50 غم) في الميكرويف او على حمام بخار.

بالخلاط نخفق 3 بيضات مع نص كاسة سكر عادي ورشة ملح صغيرة عشان تكسر حدة الشوكولاتة وملعقة صغيرة فانيلا سائلة. لما يصير مزيج مخفوق منيح ونافخ بنضيف مزيج الشوكولاتة مع الزبدة. بنحرك منيح بس يدوياً ما بنشغل الخلاط بهاي المرحلة خلص يخلف عليه. بنضيف ثلاث ارباع كاسة طحين وملعقة صغيرة بيكينغ باودر وثلاث ارباع كاسة لوز مطحون (اذا ما بدكم تطحنوا بالبيت موجود بكل سوبر ماركت اليوم), وبنحرك. صار عندنا عجينة . بنغطيها بنايلون وبنحطها بالفريزر لمدة ساعتين لحد ما تبرد وتصير اجمد.

بعد ما نطلعها من الفريزر بنصير نطول منها شوي شوي ونعمل شكل كرات صغيرة. بنكون محضرين على جنب صحن فيه سكر عادي خشن, وكمان صحن فيه سكر ناعم (بنحتاج كاسة من كل نوع). بنصير نغلف كل كرة بالسكر الخشن, وبعدين بالسكر الناعم, وبنحطها على صينية فيها ورق خبيز. ما تقربوا الكرات من بعض لأنه عالخبيز بـ… “تبشط”! مش ملاقية كلمة ثاني تعبّر! فاهمين عليّ؟؟؟

بس بعدنا ما وصلنا مرحلة الخبيز على فكرة. لازم بعد ما خلصنا مرحلة مرمغة السكر نحط الصينية في الفريزر لمدة نص ساعة (ممكن بهاي المرحلة تحطوا بصحن اصغر حسب الوساع عندكم بالفريزر وبعدين تنقلوا على صينية فرن بتفرقش) وبعدين نخبز بفرن حرارته 190 لمدة عشر دقائق او 13 دقيقة كأقصى حد. لازم الكعكات تضل طرية ما تعاندوا وتستنوا لتصير يابسة. خلوها بالصينية ولما تبرد عالاخر قيموها وحطوها في علبة مع غطاء. بس ما تحطوها بالثلاجة, لأنها مليانة شوكولاتة والشوكولاتة بتحبش الرطوبة ابداً.

بالنسبة للكمية, فهي حسب حجم الكرات اللي بتعملوها. انا بفضل قدر الامكان صغيرة, اولاً عشان تحصلوا على عدد كبير (يمكن 40) ثانياً لأنها ثقيلة مليانة شوكولاتة.

هذا هو. تنسوش شو حكينا عن التوقعات. ودفوا حالكم منيح.

يلا باي

بعرفش وين سامعتها هاي الجملة. اعتقد من شي فيلم. هو يعني الجملة مش هيك بس لما جيت اكتب خطرت  ببالي هاي الكلمات..

بس عملياً اذا بنفكر فيها. هي مش كلام افلام. عنجد كل شي حوالينا مكون من طبقات. سواء الاشياء المرئية الملموسة, او الاشياء المخفية. كلها طبقات.

الارض طبقات.. السماء طبقات.. احنا كل على بعضنا كومة طبقات.. كل واحد فينا عبارة عن طبقات مصفصفة فوق بعض.. شكلاً , طبقات عظم ولحم وجلد وطبعاً طبعاً طبعاً يعني دهون.. وطبعاً طبعاً طبعاً برضو الدهون بطبقات!

مضموناً, كمان طبقات, صفات وميزات, ايجابيات وسلبيات, احلام وطموح ورغبات واخطاء وطباع ومخاوف ووساوس وعادات وعُقد وبلاوي زرقا, كلها مصفصفة فوق بعض بطبقات لحتى تكوّن شخصية كل واحد منا..

تاريخاً, كمان طبقات.. مراحل حياة كل واحد فينا هي عملياً طبقات.. ماضيه, الاسود او الابيض او الرمادي عاد هاي كل واحد ادرى بحاله.. الحاضر اللي عايشُه او مش عايشُه برضو كل واحد ادرى بحاله.. والمستقبل اللي بس الله ادرى بطبقاته..

وبما انه احنا بمزاج الطبقات.. بتتذكروا مرة عملنا كرواسون بكريما اللوز؟ (اسم المقالة هون “مشترى العبد ولا تربايته”).

اليوم انا عملت اشي على نفس المبدأ.. عجين طبقات, بس بما انه احنا بموسم الكستناء, قررت اعمل كريما كستناء بدل اللوز.. الطعم جديد وزاكي كثير..

يلا بلا حكي زيادة ولت وعجن.. عملياً امبلا عجن اه بلزمنا 🙂

للعجين:

نص كيلو طحين

20 غم خميرة طارجة (مكعبات) او ملعقة كبيرة خميرة فورية.

100 غم  زبدة طرية+ كمان 200 غم للطبقات.

ثلاث ارباع كاسة حليب دافي

ملعقة كبيرة ممسوحة ملح

ثلاث ارباع كاسة سكر

بيضة +صفار بيضتين

الطريقة: نذوب الخميرة في الحليب الفاتر. نخفق الزبدة (100غم) مع السكر والبيض والصفار, بنضيف الطحين والملح. بعدين بنضيف الحليب. بنعجن منيح منيح. انا طبعاً بحب العجانة بس اذا فش ممكن بالايد بس بتاخد وقت اطول ومتعبة اكثر.

بنترك العجينة ترتاح شوي. بهذا الوقت بنفرد الزبدة (200 غم) بين ورقتين فرن (ورق الخبيز) وبنرقها لحد ما يصير شكل مربع.

بنفرد العجينة وبنرقها منيح, بنحط بالوسط مربع الزبدة, بنسكر عليه العجينة وبنخبطها كم خبطة بالاشي هذا تبع العجين اللي بترقوا فيه بعرفش شو اسمه عندكم (احنا بنسميه شوبك) عشان نتأكد ان الزبدة وصلت لكل الاطراف. بعدين بنرق العجينة منيح وبنعملها هيك (الصورة من الانترنت):

بنلفها بنايلون وبنحطها بالثلاجة ساعة. بنطلعها. بنرقها وبنلفها على شكل اسطواني.

كمان مرة نايلون, عالثلاجة, ساعة. بعدها كمان مرة بنطلعها, بنرقها, وبنلفها مثل الشكل اللي فوق.

بعدها كمان ساعة بالثلاجة وخلص. بنرقها وبنقسمها قسمين.

بندهن كل قسم بكريما الكستناء اللي هي عبارة عن : 100 غم زبدة نخفقها مع 100 غم سكر, بنضيف بيضتين وبنكمل خفق, بنضيف فانيلا سائلة, 100 غرام كستناء مشوية ومقشرة ومطحونة بالميكسر, وملعقتين كبار نشا. هاي هي الكريما. ممكن نجهزها ونحطها بالثلاجة لما نعمل العجين.

بعد ما دهنا الكريما بنلف العجينة على شكل اسطوانة وبنقطعها دوائر (نفس مبدأ السينابون). اذا ضل من الكريما ممكن ندهن شوي فوق كل دائرة, اذا لأ ممكن ندهن بيض مخفوق. بنخبزها بفرن بحرارة 180 لحد ما تتحمر.

عشان احافظ على شكل موحد خبزت الدوائر بصينية مافينز.

صحة وعافية وكل واحد يخلّي بالُه من طبقاته 🙂

تخافوش مش ناوية احكي قصة, ولا مقالة تنمية بشرية.

ببساطة الاشياء الوحيدة في عالم الحلويات اللي مسموح نرميهن بالزبالة هي قشر البيض وصانع الحلويات الفاشل ! غير هيك ممنوع منعاً باتاً ترمي اشي. كل اشي اله استخدامه. هيك تعلمنا في دورة صناعة الحلويات.. كل شي كل شي ممكن تتخيلوه بنقدر نستخدمه بشكل او بآخر, ما عدا صانع حلويات فاشل, وقشر البيض.. مع ان حتى قشر البيض هالايام ممكن نستعمله في السماد ! يعني صفّى بس صانع الحلويات في خطر !!

يعني مش اذا انحرق معك بسكوت, او فرطت معك كريما, او نفّست معك كعكة, تقومي ترميهن.. صدقيني (او بالاحرى صدقي معلمة دورة الحلويات انا مالي!) انك بتلاقي لهن استخدام! كله كله ممكن تعيدي استخدامه بسكوت محروق كعك مخزوق خبز ملووق!

كل هاي المقدمة على فكرة عشان ابرر عملتي السودا.. قال عملت سوفليه (منشور لاحقاً) واستخدمت صفار البيض وضل البياض.. قلت مش جاي ع بالي اعمل مكارون او اشي مركب وطبعاً بدي اعمل فيها طالبة مطيعة بترميش اشي, فعملت كعكة اسمها كعكة الملائكة هي عبارة عن بياض بيض مخفوق و….. المهم بلاها الطريقة لأن الكعكة هبطت وفضحتني يا فرحة ما تمت.. وصار لازم ابرر فشلي وأتصرف..

فتفتت الكعكة الخاينة, وحطيتها بطنجرة على الغاز مع نص باكيت زبدة, ملعقتين كبار كاكاو, وشوية فانيلا سائلة. صارت مثل عجنة كرات الشوكلاتة.

فردتها في صينية, وعملت طبقة ثانية اللي هي عبارة عن 3 كاسات جوز هند مخلوطات مع 1 شمينت عادية, بعدين نص باكيت الزبدة المتبقي ذوبته على الغاز مع ثلاثة ارباع كاسة سكر وضفتهن على خليط الشمينت وجوز الهند وعجنت منيح. فردت هاي الطبقة على طبعة الكعكة الملفقة.

طبقة اخيرة عملت غناش عبارة عن علبة كريما خفق (شمينت متوكا) مسخنة ودرتها على 200 غم شوكلانة مرة (وانا بقدرش الا اضيف ملعقتين كبار “عشق” او بالعربي نوتيلا) وحركت منيح ودرتها على طبقة جوز الهند.

حطيتها بالثلاجة وبعد كم ساعة قطعتها وقدمتها.

الطريقة:

نعم؟!

لكان شو اللي كتبته فوق بتعتبروه؟ حمادة بالزنجبيل؟! ولا بس بدكم حجة عشان تعتبروني صانعة حلويات فاشلة وترموني؟!

يلا باي..

في اشياء لما تتذكرها او تجيب سيرتها لازم تتذكر اشياء مربوطة فيها. سلسلة حلقات كل حلقة بتوديك للي بعدها.. يعني اذا في شلة اصحاب وجبت سيرة الاول او خطر على بالك, الا ما تبلش تكر اسماء الثاني والثالث.. او مثلاً بنفعش تقول همبورغر وما يخطر ببالك تشيبس, كاتشب, مايونيز.

بس طبعاً كل واحد والروابط تبعته. يعني يمكن احكيلك همبورغر وتكون روح الطفولة بعدها دابة جواتك فتروح متخيل اللعبة اللي بوجبة الاطفال في مكدونالدز (اه بعرف كبار نفسهم فيها!).

انا مثلاً اذا حدا بجيب سيرة الحلاوة قدامي, رأساً بتخيل السمسم بعرفش ليش, بعدها بنتقل للطحينة. وهون المشكلة. اول ما اتخيل الطحينة رأساً بتخيل الدبس. وين المشكلة؟ المشكلة يا عالم اني بهاي الحالة لا اكتفي بالخيال! لازم اقوم اطبق الاشي على ارض الواقع! اي هو في بالشتوية ازكى من خبزة مقحمشة تغمس فيها طحينة مع دبس؟!

استراحة

(لازم اقوم اطبق الخيال وبرجع اكمل كتابة بعد شوي)

الحمد لله..

طيب, شو مع اللي بحط كل هاي المكونات بقالب واحد وبعمل منها كعكة؟ (بدون الهمبورغر طبعاً)

بتخيل هيك كعكة ممكن جداً تناسب الاجواء الشتوية, وفيها كل عناصر الطاقة اللي ممكن تخليك ترحم الصوبا شوي وتدفي حالك لحالك..

المقادير: جداً سهلة وممكن نتذكرها هيك:

نصاص: نص كاسة زيت, نص كاسة ماء, نص كاسة سكر عادي, نص كاسة سكر بني, نص كاسة سمسم.

ازواج: ملعقتين كبار طحينة, ملعقتين كبار دبس (دبس تمر هون – سيلان يعني), ملعقتين كبار حلاوة تدهين, كاستين طحين كعك (او طحين عادي مع باكيت بيكينغ باودر)

خارج عن القاعدة: 3 بيضات, ملعقة صغيرة فانيلا سائلة (او كيس سكر فانيلا)

الطريقة:

نخفق البيض مع نوعين السكر, الفانيلا, لما يتكون خليط منفوخ نضيف الزيت, الماء, الطحينة, الدبس, الحلاوة, وبالاخر الطحين.

ندهن قالب (انا بتستخدم المدور اللي فيه فتحة بالنص) بشوية زيت وبنرش السمسم على قاع القالب وكمان على الجوانب. بندير الخليط وبنخبز الكعكة بفرن حرارته 180 لحد ما يتحمر سطحها (شي 40-45 دقيقة حسب نوع الفرن).

لما تستوي بنستنى تبرد شوي وبعدين بنقلبها. عند التقديم ممكن نصب شوية دبس على كل قطعة, بس مش اجباري.

صحتين وعفى ودفى (وحالياً غفى كمان)..

 

 

 

كثار طلبوا مني احاول اعمل حلويات صحية. انا بصراحة بيني وبين حالي ما قدرت افهم كيف يعني حلويات وبنفس الوقت صحية؟! مش راكبة على مخي هاي المعادلة. فش فايدة.. لما اكون عاملة دايت (عادة بصمد يوم يومين بالكثير!) وبيجي على بالي اشي حلو باكل فواكه وخلص. اما الحلويات ما بنفع يكون اسمها حلويات اذا ما كانت الزبدة عاملة فيها حفلة والسعرات الحرارية تنعف نعف وترقص رقص..

طب بس مع ذلك حاولت.

انك تعطي حالك فرصة تثبت لنفسك وللناس اشي معين, خاصة اشي انت خايف منه ومش ضامن نجاحك فيه, وبصراحة مش مقتنع فيه, هو مش اشي مفهوم ضمناً , وبحاجة لشجاعة . اعطي حالك فرصة تجرب دايماً اشياء جديدة. اذا ما نفعك الاشي ما بضرّك. بس بتكسب تنويع ومتعة وحياة.. يعني انا بعرف انك تعمل حلو يكون بنفس الوقت صحي وبنفس الوقت زاكي هو مش اشي سهل. الا ما ييجي اشي على حساب اشي. بس فش هون خسارة, في يا نجاح, يا درس. وعلى كل الاحوال حيتّاكل يعني حيتّاكل 🙂

قبل ما تبلشوا تصفقوا وتهنوني على الشجاعة وقبول التحدي, بحب ابشركم اني ما نجحت, ما زبطت معي يا عمي. الا ما ادخل دسم بالموضوع فش فايدة!

بس مع ذلك حبيت اشارك النتيجة, واعطيكم الخيار, اما تتبعوا الطريقة الصحية او تزيدوا الاضافات مثل ما محسوبتكم عملت.

حلو كاسات الموز السهل (الصحي او المش صحي,  حسب!)

المقادير بتكفي لاربع كاسات ضخمة قد اللي بالصورة, بس بنصحش, مفضل كاسات اصغر وساعتها الكمية بتكفي اكثر:

نحتاج لمقدار كاسة ونص غرانولا. مبدئياً عشان نعمل من الغرانولا زي قاعدة متماسكة متراصّة متكاثفة (حاسة حالي بدعاية انتخابية!) لازم شي مكوّن يخليها تتماسك, عادة زبدة, بس بما انه الزبدة مش صحية, استبدلتها بحبة موز! عجنت حبة الموز مع الغرانولا لحد ما صار عندي اشي متماسك .. بس هو عندي سر لازم اكشفه, ممممم برضو ضفت زبدة! ما قدرت يا اخي فش فايدة (ضفت 50 غم زبدة مذوبة, انتو ما تضيفوا).

للكريم: كان بكفي نستعمل يوغورت قليل الدسم مع شوية فانيلا سائلة او خلاصة الموز للنكهة وشوية محلي اصطناعي, بنخلطهم وخلص.. بس برضو ما قدرت! فش فايدة! بصراحة جايبة معي من تركيا بودينغ بطعم الموز بنفع ما اجربه؟! بنفعش.. طب بنفع البودينغ بدون كريما \ شمينت تعطيه الكثافة المطلوبة ويعطيها القوام اللازم؟!

بنفعش.. خفقت علبة كريما مع 4 ملاعق بودينغ موز (بنفع بودينغ عادي) وضفتها ل3 علب يوغورت صغيرة.

بنصير نرتب بالكاسة طبقة غرانولا, طبقة كريم, موز مقطع, وبنكرر العملية حسب حجم الكاسات او حسب الرغبة .

وهذا هو.. سهل ولذيد و…. خفيف؟! مهو حسب اي طريقة بتختاروا.. اما بالنسبة الي انا, فش فايدة 🙂

 

 

جملة تربينا عليها.  اه بس يعني وقتها كان يعنيلنا الموجود منقوشة زعتر على خبزة, بزر عين شمس,  او ان طارت بسكوت شاي نحشيه راحة الحلقوم زي الساندويش. كانت بالنسبة النا احسن ضيافة.

قبل فترة  كنت مضطرة اجهز ضيافة, وبسبب السياسة اللي بلشت امارسها مؤخراً نظراً لالتزامات مادية جديدة, قررت اني اتأقلم مع الاشياء الموجودة بالبيت وما اضطر الجأ للدكان. لأني حدا مستحيل يدخل الدكان ويشتري بس اللازم. عشان هيك بحب اختصر, حتى صرت اغير طريقي وما امر من جنب الدكان منعاً للاغراء!

بس يا سبحان الله حتى في ظل هاي السياسة, فتحت الثلاجة, لقيت فيها كيس شوكلاتة مالتيزر كبيييير كاينة شاريته من المطار, انواع اجبان كريمية, وانواع شوكلاتة تانية. اتاري موجود اليوم يختلف عن موجود زمان يا جدعان!

حتى قوانين الضيافة اليوم تختلف عن قوانين زمان. وكلّه من النسوان! اليوم بتكون الاخت بخيلة اذا ما بتبدأ  بانواع مشروبات باردة, انواع مش نوع, ومكسرات اشكال الوان,  وفواكه اشي عادي واشي متوقعتش بحياتك تشوفه الا بالجنة (هذا اذا مكتوبلك طبعاً!),  وكعكة مع الشاي, وختامها قهوة “مع السلامة” مع حبة شوكلاتة, وفي مجتمعات فيها قهوة “اهلا وسهلا”.

طبعاً ما جبت سيرة الضيافات الموسمية, اشي بوظة بالصيف واشي سحلب بالشتاء.. انا بس حكيت عن الضيافة الاساسية وما جبت سيرة التجديدات والاختراعات والقوانين  الجديدة اللي النسوان بتطلعلنا فيها كل يوم والثاني. ناقص علينا بس يعملوا معجنات بكبدة الغزال! وكعك بلبن العصفور!

طب مين قال انه الضيافة لازم تكون اكل وبس؟؟ حدا بحياته فكّر يغيّر نمط الضيافة؟ لا مش قصدي شاحن تلفون وباسوورد الانترنت! قصدي فنجان قهوة مع نصيحة مفيدة؟ كباية شاي مع كتاب؟!!

طيب طيب ليش الغلط؟! سكتت!

ما علينا, ما حدا احسن من حدا, قررت اني ما اكتفي بتضييف الشوكلاتة المالتيزرز مع القهوة..  اه صحيح نسيت اقول, مهو لازم وعاء تضييف الشوكلاتة يكون اشي مميز كمان حسب قوانين النساوين, اشي كريستال فرنسي واشي شغل ايد هندي واشي انتيكا اندونيسي ومن هالحكي الفاضي, وانا يا عمي فش عندي الا الصيني!

قلنا ما علينا. قررت اعمل كعكة (على اساس اشي جديد علي يعني!) بس بشرط تكون من المكونات الموجودة عندي.

فطلع معي اشي زي هيك:

كعكة الجبنة بالمالتيزرز:

(المقادير والطريقة عالبركة يابا!)

للقاعدة:

باكيت بسكوت بيتي بير مطحون (بسكوت مربع للشاي – بعرفش يمكن وزنه 250 غم؟)

حفنة شوكلاتة مالتيزرز

نص او ثلاث ارباع باكيت زبدة مذوبة (حسب قديش بستهلك معك للبسكوت لحد ما يصير عجينة متماسكة)

طحنت البسكوت مع الشوكلاتة بالميكسر, ضفت الزبدة المذوبة وعجنت, صفيتها في قالب مستدير قطر 26, او بالاحرى لبّست القالب, يعني القاعدة وشوي من ارتفاع الجوانب, وحطيتها بالفريزر.

للكعكة:

تقريباً نص كيلو اجبان كريمية! القصد مش صلبة يعني, انا كان عندي نابليون, جبنة 9% وشمينت حامضة. خلطتهن مع بعض.

علبة كريما خفق (شمينت متوكا) خفقتها بالخلاط بس مش لحد ما تجمد, 80% بس, وخلطتها مع الاجبان. خلط مش خفق.

ذوبت نص باكيت جيلاتين مع ربع كاسة مي, بعد 10 دقائق سخنت الخليط شوي (فاتر) وضفته لخليط الكريما والجبنة.

ضفت فانيلا سائلة, عندي الفانيلا المركزة اللي بتعطي طعم قوي, بس ممكن اي نوع فانيلا سائلة, وممكن بدون اصلاً.

كل هذا الخليط صبيته فوق القاعدة وحطيت القالب في الفريزر ساعة وبعدين حطيته بالثلاجة لحد ما وصلوا الضيوف. كنت بفضّل اخليه طول الليل بالثلاجة عشان يشد حاله.

زينته بشوكلاتة مذوبة وباقي كيس المالتيزرز.

يمكن تقولوا شوكلاتة واجبان وكريما هاي اشياء ثانوية ولا تعتبر من الموجود. بس انا بالنسبة الي هاي اساسيات, كل ربة منزل وميولها, وكل مطبخ وموجوداته.

على كل حال, خلوا ضيافتكم ابتسامة حلوة وحديث احلى, بنظري ازكى من كل ضيافة الدنيا. واذا ولا بد, خلوا جودكم من موجودكم 🙂

بالله ما جذبكم العنوان وقررتوا تقرأوا عشان تتلذذوا بالاسرار وتعرفوا اسم الحبيب الاول؟؟ ترى بتحبوا سيرة الحب انتو..

ارتاحوا.. الحبيب الاول بالنسبة الي هون هو فريق كرة قدم, اه اه فريق بحاله بالجملة  لاعب ينطح لاعب!

اول مونديال بحضره بحياتي كان 1990, كنت طفلة مش فاهمة اشي بس في اشي جذبني لهذا العالم, وللمنتخب الايطالي المستضيف بشكل خاص.. مع انه مش هو اللي فاز بالبطولة بس خلص, الصنارة غمزت!

مش تقولوا عشان اللاعبين حلوين زي ما الكل بيحكي عن مشجعات المنتخب الايطالي! انا اصلاً كنت صغيرة مش فاهمة اشي, ولما كبرت عرفت اني بنجذبش للجمال.. يعني حجة باطلة ها!

من وقتها لهالوقت, ايطاليا وبس والباقي خس, بطلعاتها ونزلاتها, بنجاحاتها وفشلاتها. بعرف انه مش هالفريق القوي, بس خلص مش قادرة اغير عن الحب الاول.. عن الفريق اللي فوتني لعالم المستديرة, عن ورثة سكيلاتشي ومالديني ودونادوني وباريزي وهالشلة اللي تألقت بال90,  وطبعاً باجيو اللي بكّاني بال94.. خلص انا اذا حبيت اشي بلزق فيه وهات اعرف انقبع!

بنساش غرفتي بهديك الفترة زي ابو الشباب مليانة بوسترات لاعبين من ايطاليا, حتى اخوتي اللي كانوا صغار حببتهم غصب عنهم بايطاليا (تحبها وتوخذ شوكلاتة؟!) اه بالضبط خاوة مش اخوتي؟! (اليوم انشقوا يعني بس قدرت امسكهم فترة منيحة!) .. بنساش لما كنت مع المدرسة في مصر بفترة مونديال 1994 وشفت سائح اجنبي بشبه باجيو وعندت الا بدي اتصور معه! وهو مش فاهم اشي مسكين! وبنساش وقتها لما باجيو شاط الطابة عالمريخ (او عطارد, بعرفش المهم الابعد!) ودموعي لما خسروا (مش عارفة اذا عشان خسروا او خوف من الضرب لأني كنت بس انا وصديقة مع ايطاليا وكل الصف مع البرازيل!)

حبي للكرة الايطالية حببني كمان بالمطبخ الايطالي, على بساطة مكوناته وسهولة طرق الاعداد وسلاسة مذاقاته.

هو صح مش مشهور كتير بالحلويات, بس مع ذلك اخترت اليوم اقدم تحلاية ايطالية مشهورة اسمها “بانا كوتا” وترجمتها قشدة مطبوخة, او بالعربي تبعكم شمينت مطبوخة.

تفضلوا الطريقة:

المقادير:

500 مل كريما خفق او شمينت متوكا (علبتين)

150 غم سكر

ملعقة صغيرة فانيلا سائلة

نص كيس جيلاتين (7-8 غم)

الطريقة: نذوب الجيلاتين في شوية ماء.

في طنجرة نسخن علبة كريما خفق مع السكر والفانيلا, لما تبلش تغلي بنضيف خليط الجيلاتين وبنطفي النار. بنتركها تبرد.

نخفق علبة الكريما الثانية لحد ما شوي تبلش تمسك حالها , بعدين بنضيف الخليط الاول وبنتابع الخفق. تستنوش تصير كريما كثيفة كتير, بتضل سائل نوعاً ما, عادي بالثلاجة بتجمد بفعل الجيلاتين.

المعروف انه البانا كوتا بتتقدم مع صلصة فواكه او كراميل. انا لقيت عندي توت اسود, فقررت اعمل منه صلصة بس كثيفة شوي عشان تكون طبقة متماسكة.

عالغاز حطيت مقدار 300 غم توت, 150 غم سكر, 150 مل ماء, عصرة ليمونة. لما قرب التوت “يستوي”, ذوبت ملعقة نشا كبيرة في نص كاسة مي ودرتها عالخليط. رأساً بتلاحظوا انه جمد. درت الخليط في كاسات (6 كاسات كبيرة) وفوفه درت خليط البانا كوتا, وحطيتهم بالثلاجة.

للتقديم ممكن نقلب الكاسة على صحن زي هيك:

او ممكن نخليها بالكاسات زي هيك:

ممكن الاستغناء عن الصلصات او طبقات الفواكه والاكتفاء بأي صلصة جاهزة من اللي بالعلب اللي بنستعملهن للبوظة, زي صلصة التوت او الكراميل او الشوكلاتة.

بطولة اليورو 2016 عالابواب , بتأمل انه الفريق الايطالي بهالبطولة ما يفضحنا ولا يعزر علينا ويستاهل هالوصفة وغيرها,  اه وعلى فكرة هاي الوصفة جداً جداً مناسبة لرمضان اللي قرب يزورنا..  ولمزيد من الوصفات الاوروبية المناسبة لرمضان  تابعوني السنة في فقرة “يورمضان”..

بون ابيتيتو !

بحبش الفواكه.

بحاول اجبر حالي عليها مرات بس لأنها مفيدة للصحة. نوع من الدواء يعني, بس برضو بحبهاش.

حكولي طيب شو مع الفواكه الصيفية؟ فش حدا بحبهاش. لا لا ما حدا احسن من حدا, فش فرق عندي بين صيف وشتاء. الفواكه فواكه وبعتبرهاش صديق ولا بأي فصل. وتحاولوش.

طيب ولك الكرز؟ في حدا بحبش هاي التحفة الفنية الحمراء الصغيرة؟!

اشنع واشنع.

كيف بدي احب اشي بطلع فترة قصيرة وبختفي؟! على اي اساس؟! كيف بدكم اياني اعالج عدم حبي للفواكه عن طريق تعلقي بإشي زائل؟! طب بلكي تعلقت بطعمه؟! شو بصير بحالتي لما يختفي؟ اعيش بسبات لحد ما يرجع السنة الجاي؟ اعيش من موسم كرز لموسم كرز؟! لا يا عم يفتح الله..

الكرز وامثاله بذكروني بنوعية ناس موجودة بحياة كل حدا. بطلعولكم بشي توقيت بحياتكم, ببهروكم, بتتعلقوا فيهم, بس بعد فترة بديروا ظهرهم وبفسخوا. وجودهم مؤقت. أي طب مش بلا منهم من الاول؟! بس الفرق بينهم وبين الكرز انهم بختفوا بدون سابق انذار, عالاقل الكرز بعطيكم خبر انه مروح.. يمكن تقولوا عادي كل الناس موسميين ومؤقتين, انا متأسفة, بقدرش..

بس قلت يلا يا بنت, واكبي هالموجة واشتري كرز. اشتريت. قعد بالثلاجة يومين, وهو مستغرب. مالها هاي مش سائلة بحضرتنا؟ انا كل الناس بتستناني وبتتقاتل علي, طب مالها هاي مش معبرتني؟!

بصراحة حزنت عليه. يعني صح مغرور , بس برضو حرام هيك جمال واناقة تتعامل بإهمال.

قلت ما الي الا الحل المعهود, كعكة!

تشيز كيك مع كرز, او تيجوا نسميها  باختصار “تشرز” ؟! شو ما كان اسمها بتخيلش في مجال انها تكون مش زاكية.

يلا الطريقة:

المقادير:

للقاعدة: 200 غم بسكوت مطحون, مخلوط مع 100 غم زبدة مذوبة.

للكعكة:

5 بيضات مفصولة بياض وصفار.

كاسة سكر

نص كاسة طحين

نص كاسة نشا

كيس بيكينغ باودر

50 غم زبدة

750 غم لبنة حلوة (9% او 5%)

علبتين شمينت عادية

ملعقة صغيرة فانيلا سائلة

قشرة ليمونة مبشورة + ملعقة عصير ليمون

كرز (بدنا كرز للكعكة وكرز للتزيين, بس التزيين مش اجباري بالمرة)

الطريقة:

بنحضر القاعدة يعني بنخلط البسكوت مع الزبدة وبنفردها بقالب قطره 26 وبنحطه بالفريزر لحد ما نحضر الكعكة.

بنخفق الزبدة مع نص كاسة سكر, بنضيف  الصفار وبنخفق منيح, بنضيف الليمون, الفانيلا, بنضيف اللبنة والشمينت, الطحين, النشا, البيكينغ باودر. وبنترك الخليط على جنب.

بنخفق البياض مع نص كاسة سكر, وبنضيف الفانيلا. لازم يتكون زي كريما.

بنضيف خليط البياض على الخليط الاول. وبنحرك منيح بس يدوياً مش بالخلاط.

بنقطع الكرز وبنفرده فوق طبقة البسكوت, بندير فوقه خليط الكعكة, وبنخبز بفرن حرارته 200-220 لمدة عشر دقائق, وبعدين بنخفض الحرارة ل160 لمدة ساعة او ساعة وربع حسب الفرن. بعد ما تستوي الكعكة بنخليها تبرد في الفرن (نص ساعة وهو مسكر, ونص ساعة بنفتحه شوي)

اذا بدنا نعمل طبقة التزيين بنطبخ شوية كرز مع مي وسكر, لما يبلش يطرى بنذوب نشا مع شوية مي باردة وبنديرها فوق الكرز المطبوخ. بنحرك لحد ما يتكون خليط لزج. لما يبرد بنديره فوق الكعكة.

(فش عيار هون بصراحة بس لو فرضنا استعملنا ليتر مي بدنا كاسة سكر, ونص كاسة نشا)

طبعاً السيدة “تشرز” ازكى واحلى وبتكون اسم على مسمى مع طبقة التزيين, بس بما اني بتوقع انه فش حدا بضل عنده الكرز بالثلاجة وبيخلص اول بأول, لذلك ممكن تكتفوا بتزيينها بالسكر الناعم.

السيدة “تشرز” (طب مش يمكن انسة؟! شو هالاحراج!) خلتني اشعر شوي افضل ضميرياً اني ما اهملت الكرزات واستغليتهم بالاخر, بس برضو ما نجحت تغير نظرتي لقوم الفواكه..

كل موسم كرز وانتو بخير, والله يبعد عنا الناس الموسميين..