نعمة, لوتس, وحلاوة

هي الشتوية شو غير

برد

ورياح

ومطر

يتكتك على الشباك

وموقد خشب مشتعل…

وخلص بكفي لهون عمي كاظم الساهر.. بحياتي ما حسيت انه الشتوية رومانسية. نقطة.

نكمل على ذوقنا..  وطبقات اواعي (وكيلوغرامات) فوق بعض, وشهوَنة على الاكل وخاصة الحلويات؟

ياخي بحس انه حاسة الشبع بتنعدم بالشتوية. بتموت. وحاسة الفجع بتحيا وبتنعنش وبتعيش. فش حدود, فش ممنوع, في بس اكوام سكر ودهون بتجتاح الجسم, بحجة قال انه بحاجة لطاقة! وبيجي الصيف وبيجي معه الشعور بالندم على هالاكوام اللي تكدست وحوطت جسمنا بكمان طبقة ملهاش اي داعي على فكرة. وخلي الطاقة تنفعنا!

ما علينا, الاسبوع الماضي لقيت انه عندي بسكوت لوتس كثير. وانا بصراحة مش كثير بحب طعمه هيك ناشف مع الشاي او القهوة. او يمكن بشبعنيش. شبعرفني.

المهم قلت ما الي غير اعمل منه كعكة. بس زهقت كعكة اللوتس اللي الكل بعملها. طبقة بسكوت, طبقة جبنة او شمينت وطبقة زبدة لوتس مذوبة.

قلت خليني اعمل اشي مختلف شوي. فقررت اضيف نكهة الحلاوة. طبقة بسكوت, طبقة شمينت مع زبدة لوتس, طبقة شمينت بطعم الحلاوة, وطبقة فتافيت بسكوت لوتس مع سمسمية مفتفتة! يا سلام على هالتناغم والتناسق الشتوي المتميز. مش بقولوا الشتوية ام الابداع؟! عيشوا 🙂

طيب, فتحت اول باكيت بسكوت عشان افتفته لقاعدة الكعكة. طلع من اللي كل حبتين محطوطات مع بعض بغلاف نايلون واحد. انصدمت! انا بدي اقعد افتح اغلفة يعني؟! يلا بسيطة. صرت مقررة اعمل الكعكة ومجهزة النفسية والمعدة.

فتحت كل الاغلفة, وفتفتت الباكيت كله. بس للاسف الكمية ما كفّت.  لازم افتح الثاني.
الصدمة كانت انه الثاني كان من ابو كل حبة في باكيت, مش كل حبتين! كنت انبر واتذمر من الوقت والمجهود اللي بدي ابذله في تفتيح الاغلفة, هون صار بدي وقت ومجهود مضاعف. يعني انا كنت بنعمة وانا مش حاسة.

صفنت شوي.

كم مرة بحياتي صارت معي اشياء. كنت اعتبرها صعبة, نبرت عليها, تذمرت واشتكيت منها, بس بعدها بفترة يصير معي اشياء اصعب بكثير, وفجأة أحس بالنعمة اللي كنت عايشة فيها وانا مش دارية. يا عالم والله احنا عايشين بنعم وفضل من الله حتى بأصعب الاوقات, يستاهل الحمد عليها كل يوم وكل ساعة.

كم مرة كنت اتذمر من اكوام الشغل اللي عليّ, واني مش ملحقة, وانه شغلي صعب, وفجأة امرض وأضعف, وأحس بالشلل, بعدم المقدرة حتى على النهوض من الفراش (مش عارفة مالي قلبتها فصحى!) وأقول اخخخخخ بس لو اطيب الا انجز كل الشغل بسهولة وبدون تذمر..

كم مرة…… خلص بلا ما نقلبها دراما. يلا الوصفة.

IMG_6312

كعكة اللوتس والحلاوة:

للقاعدة : بسكوت لوتس مفتفت, مش مهم من ابو حبتين او حبة بغلاف.انا استخدمت باكيتين الا كم حبة (جزء للقاعدة وجزء للتزيين)

100 غم زبدة مذوبة (مع باكيت وشوي, الباقي بتركه مفتفت بدون زبدة بالوقت الحالي عشان ما يشد حاله كثير ويقسى من هون لأخلص بقية المراحل)

4 حبات صغار سمسمية مفتفتة. ممكن بدالها شوية سمسم محمص. بس انا حبيت اضافة نكهة العسل الخفيفة.

نخلط البسكوت مع الزبدة, نضيف السمسم, نفرد نص الكمية بقاعدة قالب مستدير قطر 26, والباقي بنخليه لتزيين الوجه.

بنحط القالب بالثلاجة لحد ما نجهز خليط الشمينت.

IMG_6328

للخليط بنحتاج:

1 كريما خفق شمينت متوكا

4 علب شمينت حامضة عادية

1 باكيت بودينغ فانيلا

نص ملعقة فانيلا سائلة

نص كاسة سكر ناعم

3 ملاعق كبار حلاوة للتدهين.

3 ملاعق كبار زبدة لوتس

باكيت جيلاتين. في امكانية نعمل الكعكة بكاسات صغيرة وساعتها فش داعي للجيلاتين.

نحضر الجيلاتين حسب التعليمات المكتوبة ونتركه على جنب.

نخفق الكريما, نضيف البودينغ, الفانيلا السائلة, السكر, وبالاخر الشمينت العادية.

بنسخن الجيلاتين ثواني بالميكرويف, وبنضيفه للخليط.

بنقسم الخليط قسمين: قسم بنضيف له الحلاوة, وبنخلط. وقسم زبدة اللوتس, وبنخلط.

بنصب خليط اللوتس فوق القاعدة, بنحطه كم دقيقة بالفريزر, بعدين بنضيف طبقة خليط الحلاوة.

بنحط الكعكة بالثلاجة كم ساعة, وبعدين  بنضيف لباقي البسكوت المفتفت والسمسم شوية زبدة مذوبة وبنحطها على الوجه.

IMG_6320IMG_6325

طبعًا الكعكة افضل اشي ثاني يوم.

اشكروا الله على النعم وبلاش تذمر ونبر, لأنه الله بس العالم شو مستنينا. طَ؟

يلا باي

 

 

 

 

 

الإعلانات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s