انا مش خبيرة تغذية, ولا اخصائية بشرة, ولا مدربة رياضة, ولا شيخة!

انا ببساطة كائن صباحي, متعود ينام بدري, ويصحى بدري. كائن بحب يستقبل الشمس قبل ما تطلع , ويحضر ولادة كل يوم كأنه اول يوم بحياته, وآخر يوم.

كائن مؤمن انه بداية اليوم صح, بتساعد انه يكمل صح.

عشان هيك هذا الكائن حب يعطي الصباح طابع خاص فيه. وحب يشارك باقي الكائنات تجربته. هو بالاساس الكائنات المؤنثة بس ما بيمنع انه ابو الشباب كمان يقرأ 🙂

طبعاً مثل ما حكيت انا مش حدا مختص, بس كل اللي بدي احكيه هو عن تجربة شخصية وبس. جربت كثير اشياء قبل بس جديد وصلت لصيغة الصباح المتكامل, بالنسبة الي. يمكن غيري بعمل هاي الاشياء بترتيب مختلف. انا لقيت هذا الترتيب الانسب بالنسبة الي.

بصحى الساعة 5 وربع.

اول اشي وأهم اشي بالنسبة الي هو صلاة الفجر. الراحة اللي بحسها بهاي الصلاة بالذات بتسوى الدنيا. وبرجع بحكي اني مش حدا متدين جداً, بس هاي الصلاة بتعطي لبداية اليوم طابع خاص, جسدياً, روحانياً, ونفسياً.. بعدها بحس اني صرت بعالم ثاني.. ومستعدة ابدأ يومي صفحة بيضاء.

بعد الصلاة ومتابعة للنشاط, شوية رياضة. مش اشي قاسي بصراحة, شوية تمارين عالخفيف, ومرات على جهاز المشي, لمدة ربع ساعة او عشرين دقيقة مش اكثر. الرياضة اشي بعمل نفسية رائعة, صح يعني بوقت الرياضة بفكّر بكل اشي بهالدنيا, ايجابي وسلبي, بفكر شو بدي اعمل اليوم وبشو غلطت مبارح ووو .. باختصار كمان رياضة للمخ على ساعة هالصبح مش غلط.. على فكرة مهم بالنسبة الي يكون هدوء تام, ولا نشرة اخبار ولا اي صوت, بس صوت العصافير والحوارات الداخلية جواتي.. عشان هيك اذا انتِ أم مفضل يبدأ صباحك قبل ما يصحى سي السيد وسلالته.

طبعاً فش يعني داعي اقول انه لازم حمام منعش بعد الرياضة. بتهيألي اشي مفهوم ضمناً يعني 🙂

اه اه  انتو مش غلطانين, اه لحد هاي اللحظة ما دخل معدتي اشي. اه انا سماح وانا بكامل قواي العقلية بطلت اول ما اصحى اركض على النسكافيه والكعك! بشرب مي باردة منقوع فيها ليمون ونعنع وخيار طول الليل. هاي المي كفيلة بأنها تخلص الجسم من السموم.  بس اذا بيكون جاي عبالي اشي سخن بنفع كاسة مي سخنة معصور فيها ليمون. ممكن ينحط عسل فيها كمان بس انا بحبش المشروبات السخنة يكون فيها طعم حلو.

صارت الساعة 6 تقريباً. وقت ابلش اجهز حالي للشغل. اول شي بهاي المرحلة بجيب مكعب ثلج من الفريزر وبعمل فيه مساج للوجه, لمدة دقيقة تقريباً. انا بضيف ماء الورد لهاي المكعبات كمان. هاي الخطوة المفروض تعمل على تسكير المسامات المفتوحة والها مفعول البرايمر الي بجهز البشرة للميك اب (للي بتحط ميك اب). بصراحة عملتها حتى بالايام الباردة وكان الها مفعول منشط جداً!

طبعاً بعد اللبس والتزبيط (اللي متابعين حكياتي بعرفوا انه اللبس مجهز ومكوي من الليل يومياً) بضل معي 20 دقيقة لحد ما اطلع عالشغل. بعمل شاي اخضر (بطعم النعنع, بقدرش شاي اخضر لحاله طعمه زي الملوخية!) و7 حبات لوز ني! شو بعرفني ليش 7 بس انا بحب هذا الرقم كثير. بهاي القعدة بقرأ اذكار الصباح من التلفون. كمان راحة!

الساعة 6:45 الى العمل. بالسيارة بس اذا في طلعة لاجتماعات خلال النهار. بس معظم الايام بالباص عشان امشي الصبح من المحطة الاخيرة للمكتب واتنفس انتعاش النسمات الباردة حولي وصمود سور القدس على يميني.

صباحك انتِ المفروض تتحكمي فيه, صح في اولاد وبيت وترتيب ويمكن تحضير لطبخة والى ما لا نهاية من التزامات نسائية, بس الله معطينا يوم فيه 24 ساعة, اذا قسمناهن صح بتزبط.. ابدأيها صح, عشانك انتِ, عشان اذا عشتِ صح, اللي حواليكِ كمان بعيشوا صح..

يلا باي