قبل فترة كتبت منشور عن اول فيلم هندي بحضره بحياتي من اوله لآخره.. بصراحة كنت مقنعة حالي, مثل كثير ناس ان الفيلم الهندي هو مجرد اشي طويل طويل, ممل ممل, مليان اغاني وناس بترقص, وكلهم نفس الشكل ونفس الصوت. وكل الافلام نفس القصة المش مفهومة والمش منطقية, وكلها الها نفس النهاية والبطل اللي بموت وبعيش وبموت وبعيش بطلع بالاخر اخو البطلة يا سبحان الله ..متأثرة من فيلم “طير انت” للرائع احمد مكي؟! يمكن.. بس تنكروش كثار منكم ماخدين هاي الفكرة عن الافلام الهندي.

بصراحة امي كانت تحاول تقنعني انه فكرتي غلط كل ما كنت اشوفها بتحضر فيلم هندي وآخر انسجام وبس ضايل عليها ترسم نقطة على جبينها تضامناً.. بس ولا مرة كنت اقتنع. خلص انا مقتنعة انه الفيلم الهندي هو اشي بعمل من مخي مسخرة وخلص.

لحد ما فتحنا مرة  بالشغل محادثة عميقة الها علاقة بالايمان والدين وهيك , وفاجأني احد الزملاء بتوصية على فيلم بتناول اشياء حكيناها بالمحادثة. الصاعقة كانت ان الفيلم هندي! كيف يعني؟ احنا قاعدين بنحكي مضامين كثير قوية ومعقدة وعميقة المفهوم. وانت جاي تحكيلي فيلم هندي؟!

المهم بعد ايام من التوصية تجرأت وحضرت الفيلم. فيلم واحد بس غيرلي كل فكرتي المسبقة. صح فيه اغاني ورقص يعني, وصح طويل بس مليان رسائل وتساؤلات..مليان مليان..

مش رح ادخل بمضمون الفيلم حالياً لأنه بحاجة لبوست موسع.. بس حبيت اوصل فكرة انك مهما سمعت اشياء عن اشي او حدا تصدقهاش الا لما تعطي حالك فرصة تجرب بنفسك. تجربة كاملة من الاول للاخر.

بس بما انه جبنا سيرة الهندي, حبيت اشارك بتجربة هندية بسيطة. طريقة خبز سهلة جداً اصلها من الهند. بس انا بما اني بقدرش بدون اضفاء لمستي, ولمستي فلسطينية. حبيت اضيف للخبز نكهات الزعتر الطازج والجبنة البيضاء اللي لا تخلو منها اي مائدة (او طبلية!) فطور فلسطيني تقليدي.

بس كمان مش هون النقطة, الموضوع اني بعد هالفلسفة والوطنية كلها حضرت الزعترات وفركتهن عشان ادخلهن بالعجينة واعطيها المذاق الفلسطيني, وبالاخر عجنت وخمرت العجينة وتذكرت اني نسيت احط الزعتر! فاضطريت اعمل التجربة الهندية سادة بدون اي تدخل فلسطيني, وثاني يوم عاودت عدت التجربة كمان مرة مع الزعتر اللي ضل يستناني بإخلاص.. هيك صار عنجد معي مش تقولوا تأثرت بفيلم هندي.

الطريقة:

لكل كيلو طحين بنحتاج ملعقة كبيرة خميرة, ملعقة كبيرة سكر, ملعقة كبيرة ممسوحة ملح, رشة محلب, كاستين لحد كاستين ونص حليب فاتر, كاسة لحد كاسة وربع لبن يوغورت , باكيت زبدة (100غم) مذوبة, زعتر اخضر طازج او منشف حسب الرغبة.

حوالي 300 غم جبنة بيضاء عربية مفتفتة للحشوة (ممكن بدون, مش اجباري).

نعجن كل المواد, نبدأ بالمواد الجافة بما فيها الزعتر, نضيف الزبدة, اللبن, الحليب. نعجن منيح منيح بطولة الروح لمدة 5 دقائق على الاقل.

بنغطي العجينة وبنخليها تخمر شي ساعة او حسب الطقس.

بنقطع العجينة ل 12 كرة. بنفرد كل كرة شوي على ايدنا وبنحشيها بالجبنة, بنسكرها كمان مرة على شكل كرة بس هالمرة محشية. وبنرقها هي وحشواتها على شكل رغيف. بندهن وجه الرغيف بشوية زيت زيتون.

بنسخن منيح مقلاة على الغاز بدون زيت ولا اشي, بنحط الرغيف من الوجه المدهون, بنستنى دقيقة لحد ما تتكون فقاعات, بعدين بنقلب على الوجه الثاني. بعد شوي بنتفخ الرغيف, بس تنبسطوش كثير لأنه برجع بنفّس.

وهيك بنكمل مع بقية الارغفة. سهل جداً وبوخذش وقت. وهيك بنكون جبنا الهند لعندنا وبنفس الوقت ما تنازلنا عن المذاق الفلسطيني..