زمان واحنا صغار كتير كل الحلويات اللي كنا نعرفها هي يا دوب الكعكة الاسفنجية العادية, بالشتاء بطعم عصير البرتقال, بالصيف بطعم الماء! وبأيام العز بطعم الشوكولاتة, او هو يعني مش شوكولاتة شوكولاتة, هي يعني كم ملعقة بودرة كاكاو.. وبأعياد الميلاد نفسها بس بندهنها شوكولاتة اي كلام وبنحممها بخرز ملون .. يا الله شعور انك ملكت الدنيا!

ولما يكون في حليب زيادة معناته اعطيها رز بحليب او مهلبية .. لاحقاً فات الجلي عالصورة, مهلبية فوقها جلي, كعكة بسكوت وجلي, او جلي هيك بكاسات مع حاله. وطبعاً ما ننسى الهريسة بطلة كل الاجيال.

يا عمي كان الحلو يا بارد يا سخن. فش خربطة. فش اختراعات. فش فلسفات. فش تخبيصات. وهاي موضة كعكة الشوكولاتة السخنة اتوقع لو قدمتلي اياها وانا طفلة كنت ممكن افكر انها بالغلط مش مخبوزة منيح او الكهرباء قطعت بنص الخبيز! وبصراحة ضليت هيك لوقت متأخر من حياتي.. كيف يعني كعكة من بره وسائل من جوه؟ لا وقال سخن! لا وقال بتاكل مع بوظة حتى لو بعز الشتوية!

المهم, اتاري واحنا صغار اشي, وصغار اليوم اشي ثاني خاااالص. اشوف اضحك على طفل بكعكة اسفنجية عادية؟! بتعملها؟!

اطفال اليوم مش بس فش اكتفاء بالبسيط, فش اكتفاء بالبيتي. عندكم مثلاً ميس بنت اختي اللي هي عملياً حياتي اذا بتقعد اسبوع مش ماخدها على مقهى توكل سوفليه معناته فيك اشي غلط وانت مقصر تقصير لا يغتفر!

بس دشركم من الحكي الفاضي, انا تقبلت فكرة السوفليه او كعكة الشوكولاتة السخنة بس بعد ما شفت ميسو وهي تاكلها. بقدرش اقول الا انه هذا واحد من اكثر مشاهد الحياة متعة ومغنطة! مشهد كله انسجام بين كل الحواس, وغرق كامل في حمم الشوكولاتة الساخنة, وولا مساحة  بوجهها الا وعليها اثار الجريمة, الجريمة المشروعة!

وبس عشان ميس انا صرت احب اعمل السوفليه بالبيت. هو عملياً كتير اشي بسيط وبطّل حكر بس على المقاهي زي اول. هي بس بدها انتباه لوقت الفرن, ثانية اقل- ثانية اكثر, راحت علينا..

هالمرة بدي اشارك طريقة كعكة الشوكولاتة السخنة بس مع اضافة بسيطة بس بتعمل فرق كبير, ملعقتين “عشق” (يعني نوتيلا) وحبة فيريرو بنص الكعكة.

المقادير (لحوالي 18 حبة صغار, او 9 كبار)

3 باكيتات شوكولاتة مرة – يعني 300 عم

300 غم زبدة

4 بيضات + 3 صفار

9 ملاعق كبيرة سكر

5 ملاعق كبيرة طحين

فانيلا سائلة

ملعقتين كبار نوتيلا

حبات شوكولاتة فيريرو

الطريقة: على حمام بخار (في وعاء فوق طنجرة فيها ماء ساخن عالغاز) بنحط الزبدة والشوكولاتة لحد ما يذوبوا مع بعض, بنضيف النوتيلا. بنقيمهم عن الغاز وبنضيف البيض والصفار والفانيلا, بنحرك منيح وبسررررعة الا اذا حابين تعملوا عجة بالشوكولاتة! بعدين بنضيف السكر وبنحرك منيح, وبالاخر الطحين وبنحرك منيح منيح.

بندير الخليط في قوالب كرتون مناسبة للفرن, او ممكن اواني زجاجية صغيرة خاصة للفرن. بتفرقش بس بتفرق معكم بالكمية. بوسط كل قالب بنحط حبة فيريرو, وبنفع شوكولاتة بيضاء, وبنفع بدون اصلاً. بنخبز القوالب لمدة تتراوح بين 7-13 دقيقة (كل واحدة وفرنها عاد).. طبعاً مفضل تفضي حالك يختي وتنطري باب الفرن لأنه مثل ما حكيت ثانية قبل او ثانية بعد بخرب كل شي. يعني بعينك الله بلاش فيسبوك ولا واتس اب بهدول الكم دقيقة. كيف بنعرف انها استوت؟ ببساطة لما الجوانب تبين مثل كعكة اسفنجية بس بالنص بتكون واضحة انها سائلة (بتلقلق يعني للي بعرف المصطلح!)

وبس هذا هو. بتتقدم ساخنة طبعاً, وبتلاحظوا انها معكم بتكون من جوه ازبط وسائلة اكثر مني لأني انا هون استنيت للتصوير. انتو بلاه السناب تشات هالمرة اذا ناويين تنبسطوا فيها 🙂 انتبهوا لمزيج البندق اللي نزل من الفيريرو قديش طعمه منسجم مع سخونة الكعكة.. طبعاً زي ما بدكم بتتقدم مع بوظة, كريما, فواكة, او ببساطة لحالها مع سكر ناعم..

ملاحظة: حاولوا تاكلوها بكل حواسكم وبكل متعة حسب طقوس ميسو بلاش تزعل 🙂