بغض النظر اني ضد هذا المثل لأنه كلنا احرار وفش اشي اسمه عبودية,  وكلمة عبيد لازم تنمحى من قواميسنا لأنه كلنا عبيد الله فقط.. بس ياخي بقدرش انكر اني اول ما عملت هاي الوصفة تذكرت المثل.

هيك احنا النسوان, انخلقنا للغلبة. على فكرة ما حدا فرض علينا ولا حدا بتوقع منا زيادة عن طاقتنا, احنا اللي جبناه لنفسينا!

طب مهو في معجنات بالسوق, الاسعار معقولة, والطعم روعة. ليش لازم اغلب حالي بهيك وصفة مركبة بدها وقت ومجهود؟ عشان ايش؟؟

تذكرت نكتة بعثتلي اياها صديقة قبل يومين:

“الكسلانه هي أنثى ذكيه فضلت راحتها و نفسها على كلام من يفتخرون بالمعدلة, فحصلت على العديد من المزايا :
شغالة تخدمها, زوج بجنن ولا يتكل عليها ويلاحق اولاده بنفسه , و الكثير الكثير من  المزايا التي لا تعرفها الا الكسلانات. أما المعدلة  : فهي أنثى اقل ذكاء, فضلت الحصول على كلمة معدلة و هي كلمة لاتغني ولا تسمن من جوع.. فحصلت على عمل ٢٤ ساعه , وزوج اتكالي كسول يغضب ان تأخرت طلباته حتى وان كانت متعبه صحياً … وغالبا ما تكون المعدلة طباخة سباكة كهربائية وصبي مشاوير البقاله وعامل الكراج حتى “علي عبدو” عامل الورشه بتاخذ دوره!! وبا الأخير تتدهور صحياً وتنقلب شكليا من المجهود… وفي يوم وليلة يجحد زوجها كل خدماتها وتضحياتها ومعروفها …
ويتزوج عليها بوحده كسلانه  ويحلف انه ماذاق طعم السعاده ولا عاشها الا يوم ماتزوج هالكسلانه …خلي كلمة معدلة تنفعك !!”

ما علينا, خلي كلمة معدلة تنفعني , وخليني ابلش بالوصفة بلا كثرة حكي.

للعجينة:

نص كيلو وفوقهن كمان ملعقة كبيرة طحين (هيك خاوه)

نص ملعقة كبيرة ملح

4 ملاعق كبيرة سكر

20 غم خميرة طازجة (مكعبات) – اذا فش بنفع تبدلوهن بملعقة كبيرة خميرة عادية.

كاسة ونص حليب فاتر

50 غم زبدة مذوبة

للطبقات: 300 غم زبدة

لكريما اللوز:

100 غم لوز مطحون ناعم

100 غم سكر

100 غم زبدة

2 بيض

ملعقة  ونص كبار كورنفلور (نشا)

ملعقة صغيرة فانيلا سائل

خلينا نجهز هاي الكريما بالاول ونحطها بالثلاجة. هيك: نخفق السكر والزبدة, بنضيف البيض, الفانيلا, لحد ما يتكون مزيج كريمي. بنضيف اللوز والنشا وبنتابع الخفق لحد ما يصير كريما لزجة. عالثلاجة.

لعجينة همّي:

اول شي بنجيب ال300 غم زبدة وبنحطهن بين ورقتين خبيز (ورق الزبدة او ورق الفرن) وبنرقها لحد ما يصير مربع زبدة مفرود. عالثلاجة.

بنذوب الخميرة بالحليب الفاتر وبنتركها شوي على جنب. بنذوب الزبدة (ال50 غم) وبنضيفها للحليبات.

في الخلاط\العجانة بنحط الطحين والملح والسكر. بنضيف عليهن خليط الحليب وبنعجن لمدة خمس دقائق على الاقل.

بنتابع العجن بالايد شوي لحد ما نحس العجينة طرية وناعمة.

بنشكلها على شكل كرة كبيرة, وبنعمل بالسكين اشارة X بنص الكرة.

بنغطيها وبنريحها شوي (لازمها, لانها حتعاني بعدين!)

مش عملنا اشارة x  ؟ طيب, بنبلش نفرد العجينة من كل واحد من اطراف الx  . يعني بصير عندنا عجينة خميلة بالنص, واطرافها مفرودات.  للاسف  كان لازم اصور كل المراحل بس بصراحة ما خطر ببالي اشارك الطريقة.

المهم, بنجيب مربع الزبدة من الثلاجة, بنحطه بنص العجينة على المحل الخميل وبنغطيه بالاطراف الاربعة اللي فردناها. بنرق العجينة منيح عشان تتوزع الزبدة على كل الجهات. بصير معنا مستطيل.

بنعمل من المستطيل 3 طويات هيك: (جبت الصورة من النت)

بنرقه كمان مرة وبنعمل منه 4 طويات هيك:

بنغطيه بنايلون وبنحطه بالثلاجة لمدة نص ساعة عالاقل. كل ما كان وقت اطول احسن.

بنطلعه من الثلاجة وبنرجع نكرر عملية الطويات 3 + 4. وكمان مرة عالثلاجة. هو احسن اشي ليلة كاملة. بس بنفع برضو ساعة.

انا بصراحة اعجبتني شغلة الطويات فكملت عملت كمان مرة بس هالمرة طوية اسطوانية. يعني مجرد لفيت العجينة مثل الرول. بالمرة بالمرة مش اجباري. اجتهاد شخصي.

بالاخر هيك طلعت, هي كل الفكرة من هاي العجينة انه تعمل طبقات.

بنطلع العجينة من الثلاجة, بنرقها كمان مرة لمستطيل وبنقطعها مثلثات. او بنفع اذا بدنا قطع اصغر نقطع العجينة قسمين ونعمل مستطيلين. بقاعدة كل مثلث بنحط شوي من حشوة اللوز وبنلفها (شكل كرواسون) .. بنرتب الكعكات بصينية وبنخمرهن شي نص ساعة بمحل دافي (طلع معي 12 حبة) بندهن بلطف ببيضة مخفوقة وبنرش لوز مقطع رفيع. بنخبزهن بفرن بحرارة 180 لحد ما يتحمروا. طبعاً بنفع ما تنحشى بالمرة, وبنفع تنحشى اي اشي ثاني. شوكلاتة, حلاوة, تمر. حسب الرغبة.

 

طبعاً هي ما طلعت مثل الجاهزة, لأنه هناك بستخدموا ماكنات للعجن وماكنات للرق, واكيد في اسرار بنعرفهاش.. بس انا حاولت. مش معدلة وقاتلتني هاي الكلمة؟! خليها تنفعني.. وانتو انسوا الموضوع ولا كأنكم سمعتوا اشي ولا كأنكم شفتوا المنشور من الاساس.

يلا باي 🙂