“يورمضان” هي فكرة, انولدت من الحيز الافتراضي قبل سنتين بفقرة “مونديال بيتاكل” خلال كأس العالم, لما قررت اطبق اكلات من مطابخ الدول المشاركة بكأس العالم 2014 واشارك الطرق على الفيسبوك, لما سألتكم وقتها شو الاكلة اللي بتميز المطبخ النيجيري وهربتوا متذكرين؟! بديش اقول شو عملتوا لما سألتكم عن مطبخ ساحل العاج!

بالنسبة الي, هاي الاحداث الكروية العالمية هي اكثر بكثير من مجرد كرة, هي ثقافة !

السنة قررت اني لازم اطبق الفكرة بس على ارض الواقع, على ورق.. صح يعني مش حابة اسبب اذى للبيئة, بس كمان انا من عشاق الذكريات والاحتفاظ بالاشياء خارج العالم الافتراضي..

بصراحة بخبيش انه الفكرة طلعت بفترة كنت عايشة فيها نوع من هبوط معين اخذ من وقتي وتفكيري زيادة, لذلك قررت اني لازم اطلع بإشي “غير شكل” بهاي الفترة بالذات!

بطولة امم اوروبا- اليورو, واللي بتصادف هالمرة احداثها بشهر رمضان المبارك, ساعدتني اكثر ببلورة الفكرة. المطابخ الاوروبية مشهورة بحلويات جزء منها بنعرفه وجزء لأ, فكرت ليش ما نحاول نطبقها خلال رمضان, مش كل يوم قطايف وكنافة , التنويع حلو.. خاصة اذا بنلائم الاشي لنكهاتنا الرمضانية, يعني مش شرط التيراميسو الايطالي نعمله مع شراب القهوة المركز زي مهو متّبع, ممكن نستبدله بالقطر بنكهة ماء الزهر! ششش ما حدا يحكي للطليان عن هالعملة المهببة!

وبما اني حابة تكون هالفكرة هدية بمناسبة الشهر الفضيل, ومش معنية ولا بأي ربح مادي من وراها, كان لازم الاقي دعم .. بنكرش اني توجهت لجهة معينة اللي تحمست للفكرة بس ماصار نصيب, وبنكرش اني انا عندي مشكلة مع هاي الامور المادية, بحبش احس حالي بشحد مع انه الاشي زي ما حكيت مش لربح مادي شخصي..

فعاودت تنازلت..

بس الفكرة جواتي ما قبلت تتنازل.. ربنا الهمني اني اعرض الفكرة على زميل, مهنته زي ما هو عرّفها مؤخراً “يحقق احلام الاخرين”.. بالرغم من ان وضعه المادي والمعنوي بالفترة الاخيرة مش بالسما, بس صمم انه يساعدني.. “فكرتك بدها تتنفذ لو مهما كلف الامر”..

مع هاي الجملة انطلقت.. بحثت , عجنت, خفقت, خبزت, صورت, وكتبت الوصفات بأسلوبي السماحي, والنتيجة كانت زي ما شفتوا (للي حصل على الكراسة).

وللي ما حصل, هون بتلاقوا الكراسة بنسختها الالكترونية..

اهم درس تعلمته من هاي التجربة هو انك اذا بتصمم تعمل اشي, وبتكون بدك اياه من جواتك, الا ما يتحقق بعد ارادة رب العالمين .. انت بس آمن فيه, وآمن بقدراتك ..

والاشي الثاني, لما تحس بهبوط معين لأي سبب كان, ببساطة اعمل اشي بتحبه.. ابدع..

ان شاء الله النسخة الجاي بكأس العالم بتكون مطورة اكثر, وصفات اكثر, نسخ اكثر, بلاد اكثر, أطباق من كل انحاء العالم ومش بس حلويات.. يعني استنوني  كمان سنتين!

شكراً لحسام عليان على الدعم والمرافقة والثقة, شكراً ليزن عبده على التصميم, وشكراً لكل شخص ساهم بالتوزيع..