في بلدي بتعرفش تميز احياناً بين الدار وبين المجمع التجاري.
في بلدي بتنافسوا مين ببني دار اكبر واوسع وطوابق اكثر, وبعد كم سنة بستقروا بطابق واحد وبسيبوا الشقة وبلزقوا بغرفتين ثلاث مش اكثر, وما بنوب المرأة الا التعب بتنظيف الشبابيك اللي الله اعلم اذا لحقوا يعرفوا اصلاً على شو بتطل.. مهو كلهم بعملوا هيك ليش تا انا ما اعمل يعني؟ شو ناقصني؟
في بلدي العروس وأهلها مجبورين يجهزوا البيت مهما كان حجمه, ومهما كانت حالتهم المادية, من اكبر اداة كهرباء لأصغر علبة تنحط فيها علبة قش الاسنان.. في بلدي عرايس بتتنافس مين جابت اغلى اثاث (للعرض) واكثر طقومة كريستال (للغبرة) .. مهو كلهم بعملوا هيك ليش تا انا ما اعمل يعني؟ شو ناقصني؟ في بلدي بستنوا بيوم “الغراظ” .. يوم الحسم! يوم فحص تطبيق قانون الجهاز. واخ لو العروس مش مطبقة احد البنود يا ويلها من النظرات والهمسات والوتوتات! اباييي لو انها مش مطلعة علبة الفليت! ببيدوا ناموس جدها الاول!
في بلدي العروس والعريس بقضوا فترة الخطبة يراكضوا ويجهزوا بلاطياً مطبخياً صالونياً غرفياً نجارياً حدادياً فستانياً , وبنسوا يتجهزوا نفسياً معنوياً حياتياً مرحلياً.
في بلدي بحرقوا المصاري تعبيراً عن الفرح , قصدي شلالات ونوافير النار او ما يسمى بالعربية النحوية الصرفة “زيقوقيم”. مهو كلهم بعملوا هيك ليش تا انا ما اعمل يعني؟ شو ناقصني؟
في بلدي العرس ببدأ قبل اليوم المنتظر بأسبوع, ضيوف لساعات متأخرة, أكل وشرب اصناف اشكال الوان, بتلاقي الضيفة حاملة تفاحة بإيد, وكعكة بالايد الثانية وحبة الشوكلاتة يا دوب زلطتها, وأهل الدار عم بلفوا بصينية بقلاوة مشان واجب الضيافة عيب.. طب الجماعة اكيد متغديين بدورهم مش قاعدين بمجاعة! لا مهو كلهم بعملوا هيك ليش تا انا ما اعمل يعني؟ شو ناقصني؟ في بلدي اهل العرس بوصلوا حفلة العرس طافيين خالصين بدهم مين يحملهم.. الله يخلف عالمكياج اللي بخفي السواد اللي تحت عيون اخت العريس اللي صارلها مش نايمة اسبوع.
بس كمان في بلدي احنا الجماعة اللي نناشد بالتغيير بس شاطرين نحكي ونطزع بوستات, خايفين نبادر بالتغيير, مكملين بنفس الطريق, واول ما يصير في بيتنا عرس, بنطبق كل البنود التي ذكرت اعلاه بحذافيرها.. مهو كلهم بعملوا هيك ليش تا انا ما اعمل يعني؟ شو ناقصني؟
مهو هيك في بلدي!
كل موسم افراح وبلدي بخير..
سماح, كلام وطعام! 