قبل فترة قررت اطلع بمبادرة شخصية, ودعيت اصدقائي ينضموا, هاي انه ولا حدا عبرني ولا حدا انضم وانا زعلت وضربت بوز واكتئبت وحردت مش هذا موضوعنا.. خليها لحساب ثاني..

المبادرة كانت اني ارتاح من تلفوني الذكي لمدة ساعة على الاقل كل يوم, واقضي هاي الساعة بأشياء مفيدة, او مش مفيدة ياخي, بس على الاقل اركز فيها!

كثار قالوا عادي اصلاً ساعة مقدور عليها, والاشي لا يعتبر تحدي.. وانا كمان هيك قلت, شو يعني ساعة بدون واتس اب وفايبر وفيسبوك وايميلات وتطبيقات, اصلاً بس عادي.. بس التطبيق عملياً كان بالمرة مش عادي..

في شعور جواتنا بسحبنا كل شوي نفحص تلفوناتنا هيك لا شعورياً  واحنا مغمضين وبدون اي سبب .. حتى لو التلفون ما رن وحتى لو احنا ما بنستنى اشي, لازم كل شوي جولة تفقدية استطلاعية لأقل من ثانية بالتلفون.. ولو بتركزوا شوي, بتلاقوا انه هالثانية هاي ممكن تشتت التركيز..

بنكون قاعدين باجتماع او حتى بقعدة اصدقاء, رنة واتس اب, بنرد, رنة فايبر, بنرد, رسالة فيسبوك, بنرد, تعليق فيسبوك, بنرد, استنى شوي في ايميل ضروري, بدي ارد, لحظة ادورلك عليه في جوجل, لحظة ولحظة ولحظة, لحد ما تخلص القعدة, لا ركزنا فيها, ولا عشنا اللحظة ولا هي عاشتنا..

الهواتف الذكية اختراع ذكي جداً, ما بنكر, ومش عارفة كيف كنا عايشين بدونها, اه  بس مش لدرجة انها تسلب منا الذكاء والتركيز وتتركنا متعلقين فيها بكل غباء..

المبادرة كان اسمها fool hour – بترجمة حرفية “ساعة حماقة\ غباء” بس طبعاً مش القصد انه نكون فيها اغبياء لأنه احنا عملياً باقي ال 23 ساعة بنكون هيك! بمزح.. انا قصدت بمعنى انها ساعة بدون تلفونات “ذكية”.. تلاعب بالكلمات..

لما جيت بدي احط صورة مرافقة للمبادرة, خطر ببالي رأساً صورة فول! يعني من باب التشابه بالحروف مش اكثر!

ما كان قصدي انه الفول هو اشي غبي! هو يعني صحن فول مع حمص كوجبة فطور بيوم شغل اه بخليك اشي غبي عالاخر وابقى قابلني اذا بتركز بإشي بعدها! بس والله انا نيتي ما كانت هيك بالمرة.. ولا قصدت اني اجرح الفول..

عشان هيك قررت اني اراضيك يا فول واعمل منك اشي زاكي, خفيف, منه بنتصالح انا وياك, ومنه بفطر انا 🙂

تغميسة فول حارة مع سمبوسك بالجبنة البيضاء.

للتغميسة:

علبة فول

بصلة صغيرة

سن ثوم

5 ملاعق صلصة بندورة

قرن فلفل حار

كمون, ملح.

ملعقة صغيرة عصير ليمون

ملعقة كبيرة زيت زيتون.

في مقلاة على الغاز نسخن ملعقة زيت زيتون, نفرم البصل والثوم ونضيفه للزيت, بعد ما يذبل نضيف الفلفل, وبعدين الفول, وبنخفف الحرارة.

بعد ما يطرى الفول شوي, بندير كل المحتوى في الخلاط , بنضيف صلصة البندورة, الليمون, الملح والكمون, وبنطحن لحد ما نحصل على الملمس المناسب, اللي بحب تغميسة سائلة اكتر ممكن يضيف زيت زيتون.

للسمبوسك:

لكل كيلو طحين, نحتاج كاسة زيت ذرة, ملعقة كبيرة ملح, رشة محلب, و3-4 اكواب ماء. ممكن اضافة ملعقتين حبة البركة.

نعجن كل المواد, نقطع العجينة الى كرات كبيرة, تفرد كل كرة وتقطع بواسطة فنجان او قطاعة بسكوت الى دوائر.

تحشى بالجبنة البيضاء وتقفل على شكل نصف قمر.

تقلى بالزيت الحار الغزير. (مفضل بعد الحشي تنحط بالفريزر, اسهل للقلي).

تقدم مع تغميسة الفول, او بدون. هو انا بس عشان الصلحة عملتله قيمة وقدمته معه.. خلص خلص بلاش يرجع يزعل بعدين!

نهار فـ(و)ل 🙂